Uvasagadasao 8.49

8.49

teṇaṃ kāleṇaṃ teṇaṃ samaeṇaṃ sāmī samosaḍhe|
parisā niggayā| kūṇie rāyā jahā, tahā seṇio niggacchai jāva pajjuvāsai|
tae ṇaṃ se mahāsatae gāhāvaī imīse kahāe laddhaṭṭhe samāṇe–evaṃ khalu samaṇe bhagavaṃ mahāvīre puvvāṇupuvviṃ caramāṇe gāmāṇugāmaṃ dūijjamāṇe ihamāgae iha saṃpatte iha samosaḍhe iheva rāyagihassa nayarassa bahiyā guṇasilae ceie ahāpaḍirūvaṃ oggahaṃ ogiṇhittā saṃjameṇaṃ tavasā appāṇaṃ bhāvemāṇe viharai|
taṃ mahapphalaṃ khalu bho! devānuppiyā! tahārūvāṇaṃ arahaṃtāṇaṃ bhagavaṃtāṇaṃ nāmagoyassa vi savaṇayāe, kimaṃga puṇa abhigamana-vaṃdana-namaṃsaṇa-paḍipucchaṇa-pajjuvāsaṇayāe? egassa vi āriyassa dhammiyassa suvayaṇassa savaṇayāe, kimaṃga puṇa viulassa aṭṭhassa gahaṇayāe? taṃ gacchāmi ṇaṃ devānuppiyā! samaṇaṃ bhagavaṃ mahāvīraṃ vaṃdāmi namaṃsāmi sakkāremi sammāṇemi kallāṇaṃ maṃgalaṃ devayaṃ ceiyaṃ pajjuvāsāmi–
evaṃ saṃpehei, saṃpehettā ṇhāe kayabalikamme kaya-kouya-maṃgala-pāyacchitte suddhappāvesāiṃ maṃgallāiṃ vatthāiṃ pavara parihie appamahagghābharaṇālaṃkiyasarīre sayāo gihāo paḍinikkhamai, paḍinikkhamittā sakoreṃṭamalladāmeṇaṃ chatteṇaṃ dharijjamāṇeṇaṃ manussavaggurāparikhitte pādavihāracāreṇaṃ rāyagihaṃ nayaraṃ majjhaṃmajjheṇaṃ niggacchai, niggacchittā jeṇāmeva guṇasilae ceie, jeṇeva samaṇe bhagavaṃ mahāvīre, teṇeva uvāgacchai, uvāgacchittā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā naccāsaṇṇe nāidūre sussūsamāṇe namaṃsamāṇe abhimuhe vinaeṇaṃ paṃjaliuḍe pajjuvāsai|
tae ṇaṃ samaṇe bhagavaṃ mahāvīre mahāsatayassa gāhāvaissa tīse ya mahaimahāliyāe parisāe jāva dhammaṃ parikahei| parisā paḍigayā, rāyā ya gae|
tae ṇaṃ mahāsatae gāhāvaī samaṇassa bhagavao mahāvīrassa aṃtie dhammaṃ soccā nisamma haṭṭhatuṭṭha-cittamāṇaṃdie pīimaṇe paramasomaṇassie harisavasavisappamāṇahiyae uṭṭhāe uṭṭhei, uṭṭhettā samaṇaṃ bhagavaṃ mahāvīraṃ tikkhutto āyāhiṇa-payāhiṇaṃ karei, karettā vaṃdai namaṃsai, vaṃdittā namaṃsittā evaṃ vayāsī–saddahāmi ṇaṃ bhaṃte! niggaṃthaṃ pāvayaṇaṃ, pattiyāmi ṇaṃ bhaṃte! niggaṃthaṃ pāvayaṇaṃ, roemi ṇaṃ bhaṃte! niggaṃthaṃ pāvayaṇaṃ, abbhuṭṭhemi ṇaṃ bhaṃte! niggaṃthaṃ pāvayaṇaṃ| evameyaṃ bhaṃte! tahameyaṃ bhaṃte! avitahameyaṃ bhaṃte! icchiya-meyaṃ bhaṃte! paḍicchiyameyaṃ bhaṃte! icchiya-paḍicchiyameyaṃ bhaṃte! se jaheyaṃ tubbhe vadaha| jahā ṇaṃ devānuppiyāṇaṃ aṃtie bahave rāīsara-talavara-māḍaṃbiya-koḍuṃbiya-ibbha-seṭṭhi-senāvai-satthavāhappa-bhiiyā muṃḍā bhavittā agārāo anagāriyaṃ pavvaiyā, no khalu ahaṃ saṃcā-emi muṃḍe bhavittā agārāo anagāriyaṃ pavvaittae| ahaṃ ṇaṃ devānuppiyāṇaṃ aṃtie paṃcāṇuvvaiyaṃ sattasikkhāvaiyaṃ–duvālasavihe sāvagadhammaṃ paḍivajjissāmi| ahāsuhaṃ devānuppiyā! mā paḍibaṃdhaṃ karehi|
tae ṇaṃ se mahāsatae gāhāvaī samaṇassa bhagavao mahāvīrassa aṃtie sāvayadhammaṃ paḍivajjai, navaraṃ–aṭṭha hiraṇṇa-koḍīo sakaṃsāo| aṭṭha vayā| revatīpāmokkhāhiṃ terasahiṃ bhāriyāhiṃ avasesaṃ mehuṇavihiṃ paccakkhāi| imaṃ ca ṇaṃ eyārūvaṃ abhi-ggahaṃ abhigeṇhati–kallākalliṃ ca ṇaṃ kappai me vedoṇiyāe kaṃsapāīe hiraṇṇabhariyāe saṃvavaharittae|
tae ṇaṃ se mahāsatae samaṇovāsae jāe–abhigayajīvājīve jāva samaṇe niggaṃthe phāsuesaṇijjeṇaṃ asana-pāna-khāima-sāimeṇaṃ vattha-paḍiggaha-kaṃbala-pāyapuṃchaṇeṇaṃ osaha-bhesajjeṇaṃ pāḍihārieṇa ya pīḍha-phalaga-sejjā-saṃthāraeṇaṃ paḍilābhemāṇe viharai|
tae ṇaṃ samaṇe bhagavaṃ mahāvīre bahiyā janavayavihāraṃ viharai|