Uvasagadasao 8.50

8.50

tae ṇaṃ tīse revatīe gāhāvaiṇīe annadā kadāi puvvarattāvarattakālasamayaṃsi kuḍuṃbaṃ jāgariyaṃ jāgaramāṇīe imeyārūve ajjhatthie ciṃtie patthie manogae saṃkappe samuppajjitthā–evaṃ khalu ahaṃ imāsiṃ duvālasaṇhaṃ sapattīṇaṃ vighāteṇaṃ no saṃcāemi mahāsataeṇaṃ samaṇovāsaeṇaṃ saddhiṃ orālāiṃ mānussayāiṃ bhogabhogāiṃ bhuṃjamāṇī viharittae| te seyaṃ khalu mamaṃ eyāo duvālasa vi savattīo aggipaogeṇa vā satthappaogeṇa vā visappaogeṇa vā jīviyāo vavarovittā etāsiṃ egamegaṃ hiraṇṇakoḍiṃ egamegaṃ vayaṃ sayameva uvasaṃpajjittā ṇaṃ mahāsataeṇaṃ samaṇovāsaeṇaṃ saddhiṃ orālāiṃ mānussayāiṃ bhogabhogāiṃ bhuṃjamāṇī viharittae– evaṃ saṃpehei, saṃpehettā tāsiṃ duvālasaṇhaṃ savattīṇaṃ aṃtarāṇi ya chiddāṇi ya virahāṇi ya paḍijāgaramāṇī-paḍijāgaramāṇī viharai|
tae ṇaṃ sā revatī gāhāvaiṇī annadā kadāi tāsiṃ duvālasaṇhaṃ savattīṇaṃ aṃtaraṃ jāṇittā cha savattīo satthappaogeṇaṃ uddavei, cha savattīo visappaogeṇaṃ uddavei, uddavettā tāsiṃ duvālasaṇhaṃ savattīṇaṃ kolaghariyaṃ egamegaṃ hiraṇṇakoḍiṃ, egamegaṃ vayaṃ sayameva paḍivajjittā mahāsataeṇaṃ samaṇovāsaeṇaṃ saddhiṃ orālāiṃ mānussayāiṃ bhogabhogāiṃ bhuṃjamāṇī viharai|
tae ṇaṃ sā revatī gāhāvaiṇī maṃsaloluyā maṃsamucchiyā maṃsagaḍhiyā maṃsagiddhā maṃsa ajjho-vavaṇṇā bahuvihehiṃ maṃsehiṃ sollehi ya taliehi ya bhajjiehi ya suraṃ ca mahuṃ ca meragaṃ ca majjaṃ ca sīdhuṃ ca pasaṇṇaṃ ca āsāemāṇī visāemāṇī paribhāemāṇī paribhuṃjemāṇī viharai|