Uvasagadasao 8.51

8.51

tae ṇaṃ rāyagihe nayare annadā kadāi amāghāe ghuṭṭhe yāvi hotthā|
tae ṇaṃ sā revatī gāhāvaiṇī maṃsaloluyā maṃsamucchiyā maṃsagaḍhiyā maṃsagiddhā maṃsa-ajjhovavaṇṇā kolagharie purise saddāvei, saddāvettā evaṃ vayāsī–tubbhe devānuppiyā! mamaṃ kolahariehiṃto vaehiṃto kallākalliṃ duve-duve goṇapoyae uddaveha, uddavettā mamaṃ uvaṇeha|
tae ṇaṃ te koladhariyā purisā revatīe gāhāvaiṇīe taha tti eyamaṭṭhaṃ vinaeṇaṃ paḍisuṇaṃti, paḍisuṇittā revatīe gāhā vaiṇīe kolahariehiṃto vaehiṃto kallākalliṃ duve-duve goṇapoyae vaheṃti, vahettā revatīe gāhāvaiṇīe uvaṇeṃti|
tae ṇaṃ sā revatī gāhāvaiṇī tehiṃ goṇamaṃsehiṃ sollehiṃ ya taliehi ya bhajjiehi suraṃ ca mahuṃ ca meragaṃ ca majjaṃ ca sīdhuṃ ca pasaṇṇaṃ ca āsāemāṇī visāemāṇī paribhāemāṇī paribhuṃjemāṇī viharai|