Uvasagadasao 8.52

8.52

tae ṇaṃ tassa mahāsatagassa samaṇovāsagassa bahūhiṃ sīla-vvaya-guṇa-veramaṇa-paccakkhāṇa-posaho-vavāsehiṃ appāṇaṃ bhāvemāṇassa coddasa saṃvaccharā vīikkaṃtā| paṇṇarasamassa saṃvaccharassa aṃtarā vaṭṭamāṇassa annadā kadāi puvvarattāvarattakālasamayaṃsi dhammajāgariyaṃ jāgaramāṇassa imeyārūve ajjhatthie ciṃtie patthie manogae saṃkappe samuppajjitthā–evaṃ khalu ahaṃ rāyagihe nayare bahūṇaṃ jāva āpucchaṇijje paḍipucchaṇijje, sayassa vi ya ṇaṃ kuḍuṃbassa meḍhī jāva savvakajjavaḍḍhāvae, taṃ eteṇaṃ vakkheveṇaṃ ahaṃ no saṃcāemi samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharittae|
tae ṇaṃ se mahāsatae samaṇovāsae jeṭṭhaputtaṃ mitta-nāi-niyaga-sayaṇa-saṃbaṃdhi-parijaṇaṃ ca āpucchai, āpucchittā sayāo gihāo paḍinikkhamai, paḍinikkhamittā rāyagihaṃ nayaraṃ majjhaṃmajjheṇaṃ niggacchai, niggacchittā jeṇeva posahasālā, teṇeva uvāgacchai, uvāgacchittā posahasālaṃ pamajjai, pamajjittā uccārapāsavaṇabhūmiṃ paḍilehei, paḍilehettā dabbhasaṃthārayaṃ saṃtharei, saṃtharettā dabbhasaṃthārayaṃ duruhai, duruhittā posahasālāe posahie baṃbhayārī ummukkamaṇisuvaṇṇe vavagayamālāvaṇṇagavilevaṇe nikkhittasatthamusale ege abīe dabbhasaṃthārovagae samaṇassa bhagavao mahāvīrassa aṃtiyaṃ dhammapannattiṃ uvasaṃpajjittā ṇaṃ viharai|
tae ṇaṃ sā revatī gāhāvaiṇī mattā luliyā viiṇṇakesī uttarijjayaṃ vikaḍḍhamāṇī-vikaḍḍhamāṇī jeṇeva posahasālā jeṇeva mahāsatae samaṇovāsae, teṇeva uvāgacchai, uvāgacchittā mohummāya-jaṇaṇāiṃ siṃgāriyāiṃ itthibhāvāiṃ uvadaṃsemāṇī-uvadaṃsemāṇī mahāsatayaṃ samaṇovāsayaṃ evaṃ vayāsī–haṃbho! mahāsatayā! samaṇovāsayā! dhammakāmayā! puṇṇakāmayā! saggakāmayā! mokkhakāmayā! dhammakaṃkhiyā! puṇṇakaṃkhiyā! saggakaṃkhiyā! mokkhakaṃkhiyā! dhammapivāsiyā! puṇṇapivāsiyā! saggapivāsiyā! mokkhapivāsiyā! kiṃ ṇaṃ tubbhaṃ devānuppiyā! dhammeṇa vā puṇṇeṇa vā saggeṇa vā mokkheṇa vā, jaṃ ṇaṃ tuma mae saddhiṃ orālāiṃ mānussayāiṃ bhogabhogāiṃ bhuṃjamāṇe no viharasi?
tae ṇaṃ se mahāsatae samaṇovāsae revatīe gāhāvaiṇīe eyamaṭṭhaṃ no āḍhāi no pariyāṇāi, aṇāḍhāyamāṇe apariyāṇamāṇe tusiṇīe dhammajjhāṇovagae viharai|
tae ṇaṃ sā revatī gāhāvaiṇī mahāsatayaṃ samaṇovāsayaṃ doccaṃ pi taccaṃ pi evaṃ vayāsī–haṃbho! mahāsatayā! samaṇovāsayā! kiṃ ṇaṃ tubbhaṃ devānuppiyā! dhammeṇa vā puṇṇeṇa vā saggeṇa vā mokkheṇa vā, jaṃ ṇaṃ tumaṃ mae saddhiṃ orālāiṃ mānussayāiṃ bhogabhogāiṃ bhuṃjamāṇe no viharasi?
tae ṇaṃ se mahāsatae samaṇovāsae revatīe gāhāvaiṇīe doccaṃ pi taccaṃ pi evaṃ vutte samāṇe eyamaṭṭhaṃ no āḍhāi no pariyāṇāi, aṇāḍhāyamāṇe apariyāṇamāṇe viharai|
tae ṇaṃ sā revatī gāhāvaiṇī mahāsataeṇaṃ samaṇovāsaeṇa aṇāḍhāijjamāṇī apariyā-ṇijjamāṇī jāmeva disaṃ pāubbhūyā tāmeva disaṃ paḍigayā|