Uvasagadasao 8.53

8.53

tae ṇaṃ se mahāsatae samaṇovāsae paḍhamaṃ uvāsagapaḍimaṃ uvasaṃpajjittā ṇaṃ viharai|
tae ṇaṃ se mahāsatae samaṇovāsae paḍhamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se mahāsatae samaṇovāsae doccaṃ uvāsagapaḍimaṃ, evaṃ taccaṃ, cautthaṃ, paṃcamaṃ, chaṭṭhaṃ, sattamaṃ, aṭṭhamaṃ, navamaṃ, dasamaṃ, ekkārasamaṃ uvāsagapaḍimaṃ ahāsuttaṃ ahākappaṃ ahāmaggaṃ ahātaccaṃ sammaṃ kāeṇaṃ phāsei pālei sohei tīrei kittei ārāhei|
tae ṇaṃ se mahāsatae samaṇovāsae teṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamanisaṃtae jāe|
tae ṇaṃ tassa mahāsatagassa samaṇovāsayagassa annadā kadāi puvvarattāvarattakāle dhammajāgariyaṃ jāgaramāṇassa ayaṃ ajjhatthie ciṃtie patthie manogae saṃkappe samuppajjitthā–evaṃ khalu ahaṃ imeṇaṃ orāleṇaṃ viuleṇaṃ payatteṇaṃ paggahieṇaṃ tavokammeṇaṃ sukke lukkhe nimmaṃse aṭṭhicammāvaṇaddhe kiḍikiḍiyābhūe kise dhamaṇisaṃtae jāe| taṃ atthi tā me uṭṭhāṇe kamme bale vīrie purisakkāra parakamme saddhā-dhii-saṃvege, taṃ jāvatā me atthi uṭṭhāṇe kamme bale vīrie purisakkāra-parakkame saddhā-dhii-saṃvege, jāva ya me dhammāyarie dhammovaesae samaṇe bhagavaṃ mahāvīre jiṇe suhatthī viharai, tāvatā me seyaṃ kallaṃ pāuppabhāyāe rayaṇīe jāva uṭṭhiyammi sūre sahassa-rassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsiyassa bhattapāna-paḍiyāikkhiyassa, kālaṃ aṇavakaṃkha-māṇassa viharittae–evaṃ saṃpehei, saṃpehettā kallaṃ pāuppabhāyāe rayaṇīe uṭṭhiyammi sūre sahassarassimmi dinayare teyasā jalaṃte apacchimamāraṇaṃtiyasaṃlehaṇā-jjhūsaṇā-jjhūsie bhattapāna-paḍiyāikkhie kālaṃ anavakaṃkhamāṇe viharai|
tae ṇaṃ tassa mahāsatagassa samaṇovāsagassa subheṇaṃ ajjhavasāṇāṇaṃ subheṇaṃ pariṇāmeṇaṃ lesāhiṃ visujjhamāṇīhiṃ, tadāvaraṇijjāṇaṃ kammāṇaṃ khaovasameṇaṃ ohināṇe samuppaṇṇe puratthime ṇaṃ lavaṇasamudde joyaṇasāhassiyaṃ khettaṃ jāṇai pāsai, dakkhiṇe ṇaṃ lavaṇasamudde joyaṇasāhassiyaṃ khettaṃ jāṇai pāsai, paccatthime ṇaṃ lavaṇasamudde joyaṇasāhassiyaṃ khettaṃ jāṇai pāsai uttare ṇaṃ jāva cullahimavaṃtaṃ vāsaharapavvayaṃ jāṇai pāsai, uḍḍhaṃ jāva sohammaṃ kappaṃ jāṇai pāsai ahe imīse rayaṇappabhāe puḍhavīe loluyaccuyaṃ narayaṃ caurāsīivāsasahassaṭṭhiiyaṃ jāṇai pāsai|