Biha Kappa v2.p121

v2.p121

|| kasiṇākasiṇapagayaṃ || [suttaṃ]–no kappati niggaṃthāṇa vā niggaṃthīṇa vā kasiṇāī vatthāī dhārittae vā pariharittae vā | kappati niggaṃthāṇa vā niggaṃthīṇa vā akasiṇāī vatthāiṃ dhārittae vā pariharittae vā ||3-7||
saṃbaṃdhopaḍisiddhaṃ khalu kasiṇaṃ, cammaṃ vatthakasiṇaṃ pi ṇecchāmo |
avavādiyaṃ tu cammaṃ, ṇa vatthamiti jogaṇāṇattaṃ ||3879||
"paḍisiddhaṃ khalu0" gāhā | kaṇṭhyā | vatthaṃ ṇāvavādiyaṃ, ṇākāro paḍiseho | kiṃ paḍiseheti ? kappaṇaṃ | kassa ? kasiṇāṇaṃ vatthāṇaṃ | kasiṇaṃ ṇāma sakalaṃ | dhāraṇā ṇāma paribhujjati | pariharaṇā parivahati | esa suttattho | taṃ ceva ṇijjuttīe vitthāreti -
kasiṇassa u vatthassā, ṇikkhevo chavviho tu kātavvo | nāma ṭhavaṇā davie, khette kāle ya bhāve ya ||3880|| [ni0] duvihaṃ tu davvakasiṇaṃ, sakalakkasiṇaṃ pamāṇakasiṇaṃ ca | etesiṃ doṇhaṃ pī, patteya parūvaṇaṃ vocchaṃ ||3881|| ghaṇa masiṇaṃ ṇiruvahayaṃ, jaṃ vatthaṃ labbhate sadasiyāgaṃ | etaṃ tu sakalakasiṇaṃ, jahaṇṇagaṃ majjhimukkosaṃ ||3882||
"kasiṇassa u0" ["duvihaṃ tu0" "ghaṇa masiṇaṃ0"] gāhā | davvakasiṇaṃ gāhāsiddhaṃ | 'niruvayaṃ' ti ṇa daṭuṃ vā koḍhiyaṃ vā | taṃ puṇa tivihaṃ - jahaṇṇayaṃ majjhimaṃ ukkosaṃ | muhapottiya-rayaharaṇa-kappā jahāsaṃkhaṃ | idamanyat pramāṇataḥ |
vitthārā''yāmeṇaṃ, jaṃ vatthaṃ labbhae samatiregaṃ | etaṃ pamāṇakasiṇaṃ, jahaṇṇayaṃ majjhimukkosaṃ ||3883|| jaṃ vattha jammi desammi dullahaṃ acciyaṃ va jaṃ jattha | taṃ khittajuyaṃ kasiṇaṃ, jahaṇṇayaṃ majjhimukkosaṃ ||3884|| jaṃ vattha jammi kālammi agghitaṃ dullabhaṃ va jaṃ jattha || taṃ kālajutaṃ kasiṇaṃ, jahaṇṇayaṃ majjhimukkosaṃ ||3885||