Biha Kappa v2.p184

v2.p184

khittammi jammi khitte, uddissati jo va jeṇa khetteṇa |
emeva ya kālassa vi, bhāvo u pasatthamapasattho ||4244||
"khittammi0" gāhā | ahavā jo jeṇaṃ khetteṇaṃ uddisai | jahā–soraṭugamādi | kāle jahā–susamasusamao|
kohādī apasattho, ṇāṇāmādī ya hoi u pasattho | udao vi khalu pasattho, titthakarā''hāraudayādī ||4245|| "kohādī0" gāhā | kaṇṭhyā | ettha kheteṇa ya kāleṇa ya atthādhikāro | uddesa tti
gayaṃ |
idāṇi pattāṇaṃ ti |
khetteṇa ya kāleṇa ya, pattāpattāṇa hoti caubhaṃgo | dohi vi patto tatito, paḍhamo bitio ya ekkeṇaṃ ||4246||
"khetteṇa0" gāhā | ettha cattāri bhaṃgā, khetteṇaṃ pattā ṇa kāleṇaṃ, kāleṇaṃ pattā na khetteṇa, khetteṇa vi kāleṇa vi pattā, ṇāvi khetteṇa ṇāvi kāleṇa | tattha paḍhamabhaṃgo -
vāsākhetta purokkhaḍa, uḍubaddha ṭhiyāṇa khettao patto | addhāṇamādiehiṃ, dullabhakhitte va bīo u ||4247|| āsāḍhapuṇṇimāe, ṭhiyā u dohiṃ pi hoṃti pattā u | tattheva ya paḍisijjhai, gahaṇaṃ ṇa u sesa bhaṃgesu ||4248||
"vāsākhetta purakkhaḍa0" puvvaddhaṃ | jattha uḍubaddhe māsakappo kao, annaṃ ca vāsāvāsapāuggaṃ khettaṃ ṇatthi, tāhe tattheva te vāsāvāsa gaya tti, ee khettao pattā ṇa kālao| jeṇa ṇa vāva (?) āsāḍhapuṇṇimāe tti bitiyabhaṃgo | addhāṇapaḍivannāṇaṃ vāsāvāsapāuggaṃ vā khettaṃ dulhaṃ, āsāḍhapuṇṇimā pattā esa bitiyabhaṃgo | taio āsāḍhapuṇṇimāe vāsāvāsapāuge ṭhiyāṇaṃ catuttho bhaṃgo | uḍubaddhe ṭhiyāṇa | eesu causu bhaṃgesu jo esa taio bhaṃgo ettha paḍisiddhaṃ vatthāṇa gahaṇaṃ na sesesu bhaṃgesu | jamhā taiyabhaṃge ṇa kappai uvahī ghettuṃ, jamhā apattehiṃ ceva khettakālehiṃ aṇāgayaṃ uvahī ghettavyo | tassa puṇa imaṃ parimāṇaṃ |
duṇhaṃ jao egassā, ṇipphajjati jaṃ ca hoti vāsāsu | aggahaṇammi vi lahugā, tattha vi āṇādiṇo dosā ||4249||