Vavahara 2: Uddeśaka 2
Vavahāra (Āgamasuttāṇi, ed. Dīparatnasāgara 2012) 2
- Language
- Ardhamāgadhī Prakrit
Uddeśaka 2
2.36
do sāhammiyā egao viharaṃti ege tattha annayaraṃ akiccaṭṭhāṇaṃ paḍisevettā āloejjā, ṭhavaṇijjaṃ ṭhavaittā karaṇijjaṃ veyāvaḍiyaṃ|
2.37
do sāhammiyā egao viharaṃti, do vi te annayaraṃ akiccaṭṭhāṇaṃ paḍisevettā āloejjā, egaṃ tattha kappāgaṃ ṭhavaittā ege nivvisejjā, aha pacchā se vi nivvisejjā|
2.38
bahave sāhammiyā egao viharaṃti, ege tattha annayaraṃ akiccaṭṭhāṇaṃ paḍisevettā āloejjā, ṭhavaṇijjaṃ ṭhavaittā karaṇijjaṃ veyāvaḍiyaṃ|
2.39
bahave sāhammiyā egao viharaṃti, savve vi te annayaraṃ akiccaṭṭhāṇaṃ paḍisevettā āloejjā, egaṃ tattha kappāgaṃ ṭhavaittā avasesā nivvisejjā, aha pacchā se vi nivvisejjā|
2.40
parihārakappaṭṭhie bhikkhū gilāyamāṇe annayaraṃ akiccaṭṭhāṇaṃ paḍisevettā āloejjā, se ya saṃtharejjā ṭhavaṇijjaṃ ṭhavaittā karaṇijjaṃ veyāvaḍiyaṃ|
se ya no saṃtharejjā anuparihārieṇaṃ karaṇijjaṃ veyāvaḍiyaṃ| se taṃ anuparihārieṇaṃ kīramāṇaṃ veyāvaḍiyaṃ sāijjejjā, se vi kasiṇe tattheva āruheyavve siyā|
2.41
parihārakappaṭṭhiyaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.42
aṇavaṭṭhappaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.43
pāraṃciyaṃ bhikkhuṃ gilāyamāṇaṃ no kappāi tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.44
khittacittaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.45
dittacittaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko tao pacchā tassa ahālahusae nāmaṃ vavahāre paṭṭhaviyavve siyā|
2.46
jakkhāiṭṭhaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.47
ummāyapattaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.48
uvasaggapattaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.49
sāhigaraṇaṃ bhikkhūṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.50
sapāyacchittaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.51
bhattapāṇapaḍiyāikkhittaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae|
agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.52
aṭṭhajāyaṃ bhikkhuṃ gilāyamāṇaṃ no kappai tassa gaṇāvaccheiyassa nijjūhittae| agilāe tassa karaṇijjaṃ veyāvaḍiyaṃ jāva tao rogāyaṃkāo vippamukko, tao pacchā tassa ahālahusae nāmaṃ vavahāre paṭṭhaviyavve siyā|
2.53
aṇavaṭṭhappaṃ bhikkhuṃ agihibhūyaṃ no kappai tassa gaṇāvaccheiyassa uvaṭṭhāvettae|
2.54
aṇavaṭṭhappaṃ bhikkhuṃ gihibhūyaṃ kappai tassa gaṇāvaccheiyassa uvaṭṭhāvettae|
2.55
pāraṃciyaṃ bhikkhuṃ agihibhūyaṃ no kappai tassa gaṇāvaccheiyassa uvaṭṭhāvettae|
2.56
pāraṃciyaṃ bhikkhuṃ gihibhūyaṃ kappai tassa gaṇāvaccheiyassa uvaṭṭhāvettae|
2.57
aṇavaṭṭhappaṃ bhikkhuṃ agihibhūyaṃ vā gihibhūyaṃ vā kappai tassa gaṇāvaccheiyassa uvaṭṭhāvettae, jahā tassa gaṇassa pattiyaṃ siyā|
2.58
pāraṃciyaṃ bhikkhuṃ agihibhūyaṃ vā gihibhūyaṃ vā kappai tassa gaṇāvaccheiyassa uvaṭṭhāvettae, jahā tassa gaṇassa pattiyaṃ siyā|
2.59
do sāhammiyā egao viharaṃti, ege tattha annayaraṃ akiccaṭṭhāṇaṃ paḍisevittā āloejjā–ahaṃ ṇaṃ bhaṃte! amugeṇaṃ sāhuṇā saddhiṃ imammi kāraṇammi paḍisevī| se ya pucchiyavve kiṃ ajjo! paḍisevī udāhu apaḍisevī?
se ya vaejjā–paḍisevī, parihārapatte| se ya vaejjā–no paḍisevī, no parihārapatte| jaṃ se pamāṇaṃ vayai se pamāṇāo ghetavve| se kimāhu bhaṃte! saccapaiṇṇā vavahārā|
2.60
bhikkhū ya gaṇāo avakkamma ohānuppehī vaccejjā, se ya anohāie ceva icchejā doccaṃ pi tameva gaṇaṃ uvasaṃpajjittāṇaṃ viharittae|
tattha ṇaṃ therāṇaṃ imeyārūve vivāde samuppajjitthā–imaṃ bho jāṇaha kiṃ paḍisevī? apaḍisevī? se ya pucchiyavve siyā kiṃ ajjo! paḍisevī udāhu apaḍisevī?
se ya vaejjā–paḍisevī, parihārapatte| se ya vaejjā–no paḍisevī, no parihārapatte| jaṃ se pamāṇaṃ vayai se pamāṇāo ghetavve| se kimāhu bhaṃte? saccapaiṇṇā vavahārā|
2.61
egapakkhiyassa bhikkhussa kappati ittariyaṃ disaṃ vā anudisaṃ vā uddisittae vā dhārettae vā, jahā vā tassa gaṇassa pattiyaṃ siyā|
2.62
bahave parihāriyā bahave aparihāriyā icchejjā egamāsaṃ vā dumāsaṃ vā timāsaṃ vā caumāsaṃ vā paṃcamāsaṃ vā chammāsaṃ vā vatthae| te annamannaṃ saṃbhuṃjaṃti, annamannaṃ no saṃbhuṃjaṃti māsaṃ, tao pacchā savve vi egao saṃbhuṃjaṃti|
2.63
parihārakappaṭṭhiyassa bhikkhussa no kappai asanaṃ vā pānaṃvā khāimaṃ vā sāimaṃ vā dāuṃ vā anuppadāuṃ vā| therā ya ṇaṃ vaejjā–imaṃ tā ajjo! tumaṃ eesiṃ dehi vā anuppadehi vā?
evaṃ se kappai dāuṃ vā anuppadāuṃ vā| kappai se levaṃ anujāṇāvettae anujāṇaha bhaṃte! levāe? evaṃ se kappai levaṃ samāsevittae|
2.64
parihārakappaṭṭhie bhikkhū saeṇaṃ paḍiggaheṇaṃ bahiyā appaṇo veyāvaḍiyāe gacchejā| therā ya ṇaṃ vaejjā-paḍiggāhehi ṇaṃ ajjo! ahaṃ pi bhokkhāmi vā pāhāmi vā| evaṃ se kappai paḍiggāhettae|
tattha no kappai aparihāriyassa parihāriyassa paḍiggahaṃsi asanaṃ vā pānaṃ vā khāimaṃ vā sāimaṃ vā bhottae vā pāyae vā, kappai se sayaṃsi vā paḍiggahaṃsi sayaṃsi vā palāsagaṃsi sayaṃsi vā kamaḍhagaṃsi sayaṃsi vā khuvvagaṃsi pāṇiṃsi vā uddhaṭṭu-uddhaṭṭu bhottae vā pāyae vā|
esa kappo aparihāriyassa parihāriyāo|
2.65
parihārakappaṭṭhie bhikkhū therāṇaṃ paḍiggaheṇaṃ bahiyā therāṇaṃ veyāvaḍiyāe gacchejjā|
therā ya ṇaṃ vaejjā–paḍiggāhehi ṇaṃ ajjo! tumaṃ pi bhokkhasi vā pāhisi vā|
evaṃ se kappai paḍiggāhettae| tattha no kappai parihāriyassa aparihāriyassa paḍiggahaṃsi asanaṃ vā pānaṃ vā khāimaṃ vā sāimaṃ vā bhottae vā pāyae vā, kappai se sayaṃsi vā paḍiggahaṃsi sayaṃsi vā palāsagaṃsi sayaṃsi vā kamaḍhagaṃsi sayaṃsi vā khuvvagaṃsi pāṇiṃsi vā uddhaṭṭu-uddhaṭṭu bhottae vā pāyae vā|
esa kappo parihāriyassa aparihāriyāo|
Translations (2)
- Vavahāra: Hindi translation (Dīparatnasāgara, 2019) — Hindi
- Vavahāra: Gujarati translation (Dīparatnasāgara, 2020) — Gujarati
Commentaries (3)
- Vyavahāravṛtti — Malayagiri, Sanskrit
- Vavahāra: ṭīkānusārī vivecana — Muni Dīparatnasāgara 2000, Gujarati
- Vyavahārabhāṣya — Māhārāṣṭrī Prakrit