Mahanisiha 3.492

3.492

(1) se bhayavaṃ jai evaṃ tā kiṃ paṃca-maṃgalassa ṇaṃ uvahāṇaṃ kāyavvaṃ
(2) goyamā paḍhamaṃ nāṇaṃ tao dayā, dayāe ya savva-jaga-jīva-pāṇa-bhūya-sattāṇaṃ attasama-darisittaṃ
(3) savva-jaga-jīva-pāṇa-bhūya-sattāṇaṃ-attasama-daṃsaṇāo ya tesiṃ ceva saṃghaṭṭaṇa-pariyāvaṇa-kilāvaṇoddāvaṇāi-dukkhu-pāyaṇa-bhaya-vivajjaṇaṃ,
(4) tao aṇāsavo, aṇāsavāo ya saṃvuḍāsavadārattaṃ, saṃvuḍāsava-dāratteṇaṃ ca damo pasamo
(5) tao ya sama-sattu-mitta-pakkhayā, sama-sattu-mitta-pakkhayāe ya arāga-dosattaṃ, tao ya akohayā amāṇayā amāyayā alobhayā, akoha-māṇa-māyā-lobhayāe ya akasāyattaṃ
(6) tao ya sammattaṃ, samattāo ya jīvāi-payattha-parinnāṇaṃ, tao ya savvattha-apaḍibaddhattaṃ, savvatthāpaḍibaddhatteṇa ya annāṇa-moha-micchattakkhayaṃ
(7) tao vivego, vivāgāo ya heya-uvāeya-vatthu-viyāleṇe-gaṃta-baddha-lakkhattaṃ, tao ya ahiya-pariccāo hiyāyaraṇe ya accaṃtamabbhujjamo;
(8) tao ya paramapavi-ttuttama-khaṃtādidasaviha-ahiṃsā-lakkhaṇa-dhammāṇuṭṭhāṇekka-karaṇa-kāravaṇāsatta-cittayā,
(9) tao ya khaṃtādidasavihaahiṃsā lakkhaṇa-dhammāṇuṭṭhāṇikka-karaṇa-kārāvaṇā-satta-cittayāe ya| savvuttamāṃ khaṃtī, savvuttamaṃ miuttaṃ, savvuttamaṃ ajjava-bhāvattaṃ, savvuttamaṃ sabajjhabbhaṃ-taraṃ, savva-saṃga-pariccāgaṃ, savvuttamaṃ sabajjhabbhaṃtara-duvālasaviha-accaṃta-ghora-vīrugga-kaṭṭha-tava-caraṇānu-ṭṭhāṇābhiramaṇaṃ, savvuttamaṃ sattara-saviha-kasiṇasaṃjamāṇuṭṭhāṇaparipālaṇekka-baddha-lakkhattaṃ savvuttamaṃ saccagiraṇaṃ chakkāya-hiyaṃ anigūhiya-bala-vīriya-purisakkāra-parakkama-paritolaṇaṃ ca| savvuttama-sajjhāyajhāṇa-salileṇaṃ pāvakamma-mala-leva-pakkhālaṇaṃ ti| savvuttamuttamaṃ ākiṃcaṇaṃ savvuttamuttamaṃ parama-pavittuttama-savva-bhāva-bhāvaṃtarehi ṇaṃ suvisuddha-savvadosa vippamukka-ṇavaguttī-saṇāha-aṭṭhārasa-parihāraṭṭhāṇa-pariveḍhiya-suddhuddhara-ghora-baṃbha vaya-dhāraṇaṃ ti|
(10) tao eesiṃ ceva savvuttama-khaṃtī-maddava-ajjava-muttī-tava-saṃjama-sacca-soya-ākiṃ-cana-sududdhara-baṃbhavaya-dhāraṇa samuṭṭhāṇeṇaṃ ca savva-samāraṃbha-vivajjaṇaṃ|
(11) tao ya–puḍhavi dagāgani-vāū-vaṇapphaī-bi-ti-cau-paṃciṃdiyāṇaṃ taheva, ajīva-kāya saṃraṃbhaṃ-samāraṃbhāraṃbhāṇaṃ ca mano-vai-kāya-tieṇaṃ tivihaṃ tiviheṇaṃ soiṃdiyādi-saṃvaraṇa-āhārādi-saṇṇā vippajaḍhattāe vosiraṇaṃ;
(12) tao ya aṭṭhārasa-sīlaṃga-sahassa-dhārittaṃ, amaliya-aṭṭhārasa-sīlaṃga-sahassa-dhāraṇeṇaṃ ca akhaliya-akhaṃḍiya-amaliya avirā-hiya-suṭṭhugguggayara-vicittābhiggaha-nivvāhaṇaṃ; |
(13) tao ya sura-manuya-tiricchoīriya-ghora parisahovasaggāhiyāsaṇaṃ samakaraṇeṇaṃ, tao ya ahorāyāi-paḍimāsuṃ mahā-payattaṃ;
(14) tao nippaḍikamma-sarīrayā, nippaḍikamma-sarīrattāe ya sukkajjhāṇe nippakaṃpattaṃ, tao ya anāi-bhava-paraṃpara-saṃciya-asesa-kammaṭṭha-rāsi-khayaṃ anaṃta-nāṇa-daṃsaṇa-dhārittaṃ ca, caugai-bhava-cāragāo nippheḍaṃ savva-dukkha-vimokkhaṃ mokkha-gamanaṃ ca;
(15) tattha adiṭṭha-jamma-jarā-maraṇāṇiṭṭha-saṃpaogiṭṭha-viyoya-saṃtāvuvvevaga-ayasabbhakkhāṇaṃ maha-vāhi-veyaṇā-roga-soga-dāridda-dukkha-bhaya-vemaṇassattaṃ,
(16) tao ya egaṃtiyaṃ accaṃtiyaṃ siva-mayalamakkhayaṃ dhuvaṃ parama-sāsayaṃ niraṃ-taraṃ savvuttamaṃ sokkhaṃ ti,
(17) tā savvameveyaṃ nāṇāo pavattejjā|
(1) tā goyamā egaṃtiya-accaṃtiya-parama-sāsaya-dhuva-niraṃtara-savvuttama-sokkha-kaṃkhuṇā paḍhama -yarameva tāvāyareṇaṃ sāmaiyamāiyaṃ loga-biṃdusāra-pajjavasāṇaṃ duvālasaṃgaṃ suyanāṇaṃ,
(2) kālaṃbilādi-jahutta-vihiṇovahāṇeṇaṃ hiṃsādīyaṃ ca tivihaṃ tiviheṇaṃ paḍikkaṃteṇa ya,
(3) sara-vaṃjana-mattā-biṃdupayakkharānūnagaṃ paya-ccheda-ghosa-baddhayāṇupuvvi-puvvānupuvvī anānu-puvvīe suvisuddhaṃ acorikkāyaeṇa egattaṇeṇaṃ suvinneyaṃ|
(4) taṃ ca goyamā anihaṇorapāra-suvicchinna-caramoyahi miyasuduravagāhaṃ sayala-sokkha-parama-heu-bhūyaṃ ca
(5) tassa ya sayala-sokkha-heu-bhūyāo na iṭṭha-devayā-namokkāravirahie keī pāraṃ gacchejjā|
(6) iṭṭha-devayāṇaṃ ca ṇamokkāraṃ paṃcamaṃgalameva goyamā no na mannaṃti|
(7) tā niyamao paṃcamaṃgalasseva paḍhamaṃ tāva viṇaovahāṇaṃ kāyavvaṃ ti||