Mahanisiha 3.493

3.493

(1) se bhayavaṃ kayarāe vihie paṃca-maṃgalassa ṇaṃ viṇaovahāṇaṃ kāyavvaṃ
(2) goyamā imāe vihie paṃcamaṃgalassa ṇaṃ viṇaovahāṇaṃ kāyavvaṃ, taṃ jahā–supasatthe ceva sohane tihi-karaṇa-muhutta-nakkhatta-joga-lagga-sasībale
(3) vippamukka-jāyāimayāsaṃkeṇa, saṃjāya-saddhā-saṃvega-sutivvatara-mahaṃtullasaṃta-suhajjha-vasāyāṇugaya-bhattī-bahumāna-puvvaṃ ninniyāṇa-duvālasa-bhatta-ṭṭhieṇaṃ,
(4) ceiyālaye jaṃtuvirahiogāse,
(5) bhatti-bhara-nibbharuddhasiya-sasīsaromāvalī-papphulla-vayaṇa-sayavatta-pasaṃta-soma-thira-diṭṭhī
(6) nava-nava-saṃvega- samucchalaṃta- saṃjāya- bahala- ghana- niraṃtara- aciṃta- parama- suha- pariṇāma-visesullāsiya-sajīva-vīriyānusamaya-vivaḍḍhaṃta-pamoya-suvisuddha-sunimmala-vimala-thira-daḍhayaraṃta karaṇeṇaṃ,
(7) khitiṇihiya-jāṇu[ṇā]ṇa si-uttamaṃga-kara-kamala-maula-sohaṃjali-puḍeṇaṃ,
(8) siri-usabhāi-pavara-vara-dhamma-titthayara-paḍimā-biṃba-viṇivesiya-nayana-mānasegaggatagga -yajjhavasāeṇaṃ
(9) samayaṇṇu-daḍha-carittādi-guṇa-saṃpaovaveya-guru-saddatthatthānuṭṭhāṇa-karaṇekka-baddha-lakkha -tavāhiya-guruvayaṇa-viṇiggaya,
(10) vinayādi-bahumāna-pariosā'nu-kaṃpovaladdhaṃ,
(11) anega- soga-saṃtāvuvvevaga- mahavādhiveyaṇā-ghora-dukkha-dāridda-kilesa-roga-jamma-jarā-maraṇa-gabbhavāsa-nivāsāi-duṭṭha-sāvagāgāha-bhīma-bhavodahi-taraṃḍaga-bhūyaṃ iṇamo,
(12) sayalāgama-majjha-vattagassa, micchatta-dosāvahaya-visiṭṭha-buddhīparikappiya-kubhaṇiya-aghaḍamāṇa-asesa-heu-diṭṭhaṃta-juttī-viddhaṃsa-ṇikka-paccala-poḍhassa paṃcamaṃgala-mahāsuyakkhaṃdhassa,
(13) paṃcajjhayaṇega-cūlā-parikkhittassa pavara-pavayaṇa-devayāhiṭṭhiyassa,
(14) tipada-paricchinnegālāvaga-sattakkhara-parimānaṃ,
(15) anaṃtagama-pajjavattha-pasāhagaṃ,
(16) savva-mahāmaṃta-payara-vijjāṇaṃ parama-bīya-bhūyaṃ,
(17) namo arahaṃtāṇaṃ ti,
(18) paḍhamajjhayaṇaṃ ahijjeyavvaṃ,
(19) taddiyahe ya āyaṃbileṇaṃ pāreyavvaṃ|
(1) taheya bīya-dīne anegāi-saya-guṇa-saṃpaovaveyaṃ, anaṃtara-bhaṇiyattha-pasāhagaṃ, anaṃtaru-tteṇeva kameṇaṃ dupaya-paricchinnegālāvaga-
paṃcakkhara-parimāṇaṃ namo siddhāṇaṃ ti bīyamajjhayaṇaṃ ahijjeyavvaṃ ti;
(2) taddiyahe ya āyaṃbileṇa pāreyavvaṃ,
(3) evaṃ anaṃtara-bhaṇieṇeva kameṇaṃ anaṃtaruttattha-pasāhagaṃ ti-pada-paricchinnegā-lāvaga-sattakkhara-parimāṇaṃ namo āyariyāṇaṃ ti taiya-majjhayaṇaṃ āyaṃbileṇaṃ ahijjeyavvaṃ,
(4) tahā ya anaṃtaruttha-pasāhagaṃ ti-paya-paricchinnegālavagaṃ-sattakkhara-parimāṇaṃ namo uvajjhā-yāṇaṃ ti cautthaṃ ajjhayaṇaṃ cauttha-dine āyaṃbileṇa eva,
(5) taheva anaṃtara bhaṇiyattha pasāhagaṃ paṃcapaya-paricchinnegālavaga-nava-kkharaparimāṇaṃ namo loe savvasāhūṇaṃ ti ti paṃcamajjhayaṇaṃ paṃcama dinaṃ āyaṃbileṇa
(6) taheva taṃ atthānugāmiyaṃ ekkārasa-paya-pari-cchinna-tiyālāvaga-tettīsa akkhara-parimāṇaṃ
eso paṃcanamokkāro savva-pāva-ppaṇāsaṇo|
maṃgalāṇaṃ ca savvesiṃ paḍhamaṃ havai maṃgalaṃ||
iti cūlaṃ ti chaṭṭha-sattama-ṭṭhama-dine teṇeva kama-vibhāgeṇa āyaṃbilehiṃ ahijjeyavvaṃ
(7) evameyaṃ paṃcamaṃgala-mahā-suyakkhaṃdhaṃ sara-vattaya-rahiyaṃ payakkhara-biṃdu-mattā-visuddhaṃ guru-guṇovaveya-guruvaiṭṭhaṃ kasiṇamahijjittā ṇaṃ tahā kāyavvaṃ jahā puvvānupuvvīe pacchānupuvvīe anānu-puvvīe jīhagge tarejjā|
(8) tao teṇevānaṃtarabhaṇiya-tihi-karaṇa-muhutta-nakkhatta-joga-lagga-sasī-bala-jaṃtu-vira-hiogāse ceiyāla-gāikameṇaṃ
(9) aṭṭhama-bhatteṇaṃ samanujāṇāviūṇaṃ goyamā mahayā pabaṃdheṇa supariphuḍaṃ niuṇaṃ asaṃdiddhaṃ suttatthaṃ anegahā soūṇa avadhāreyavvaṃ|
(10) eyāe vihīe paṃcamaṃgalassa ṇaṃ goyamā vinaovahāṇe kāyavve|