Mahanisiha 3.494

3.494

(1) se bhayavaṃ kimeyassa aciṃta-ciṃtāmaṇi-kappa-bhūyassa ṇaṃ paṃcamaṃgala-mahāsuyakkhaṃdhassa suttatthaṃ pannattaṃ goyamā
(2) iyaṃ eyassa aciṃta-ciṃtāmaṇī-kappa-bhūyassa ṇaṃ paṃcamaṃgala-mahāsuyakkhaṃdhassa ṇaṃ suttatthaṃ-pannattaṃ
(3) taṃ jahā–je ṇaṃ esa paṃcamaṃ-gala-mahāsuyakkhaṃdhe se ṇaṃ sayalāgamaṃtaro vavattī tila-tela-kamala-mayaraṃdavva savvaloe paṃcatthikāyamiva,
(4) jahattha kiriyāṇugaya-sabbhūya-guṇukkittaṇe, jahicchiya-phala-pasāhage ceva parama-thuivāe (5) se ya paramathuī kesiṃ kāyavvā savva-jaguttamāṇaṃ|
(6) savva-jaguttamuttame ya je keī bhūe, je keī bhaviṃsu, je keī bhavissaṃti, te savve ceva arahaṃtādao ceva no namanne ti|
(7) te ya paṃcahā 1 arahaṃte, 2 siddhe, 3 āyarie, 4 uvajjhāe, 5 sāhavo ya|
(1) tattha eesiṃ ceva gabbhattha-sabbhāvo imo|
(2) taṃ jahā–sa-narāmarāsurassa ṇaṃ savvasseva jagassa aṭṭha-mahā-pāḍi-herāi-pūyāisaova-lakkhiyaṃ, anannaṃ-sarisamaciṃtamappameyaṃ kevalāhiṭṭhiyaṃ pavaruttamattaṃ arahaṃti tti arahaṃtā|
(3) asesa-kamma-kkhaeṇaṃ niddaḍḍha-bhavaṃkurattāo na puṇeha bhavaṃti jammaṃ ti uvavajjaṃti vā aruhaṃtā vā,
(4) nimmahiya nihaya-niddaliya-vilūya-niṭṭhaviya-abhibhūya-sudujjayāsesa-aṭṭha-payārakamma-riuttāo vā arihaṃte i vā|
(5) evamete anegahā pannavijjaṃti, paruvijjaṃti, āghavijjaṃti, paṭṭhavijjaṃti, daṃsijjaṃti, uvadaṃsijjaṃti|
(6) tahā-siddhāṇi paramānaṃda-mahūsava mahakallāṇa-nirūvama-sokkhāṇi, nippakaṃpa-sukka jjhāṇāi-aciṃta-satti-sāmatthao sajīvavīrieyaṃ joga-nirohāiṇā maha-payatteṇitti siddhā|
(7) aṭṭha-ppayāra-kammakkha-eṇa vā siddhaṃ sajjhametesiṃ ti siddhā|
(8) siya-mājjhāyamesimiti vā siddhā,
(9) siddhe niṭṭhie pahīṇe sayala-paoyaṇa-vāya-kayaṃbametesimiti vā siddhā|
(10) evamete itthī-purisa-napuṃsa-saliṃga-annaliṃga-gihiliṃga-patteya-buddha- [buddha]-bohiya-jāva ṇaṃ kamma-kkhaya-siddhā ya bhedehi ṇaṃ anegahā pannavijjaṃti|
(11) tahā-aṭṭhārasa-sīlaṃga-sahassāhiṭṭhiya-tanū chattīsaivihamāyāraṃ jahaṭṭhiyamagilāe-mahanni-sānusamayaṃ āyaraṃti pavattayaṃti tti āyariyā|
(12) paramappaṇo ya hiyamāyaraṃti tti āyariyā
(13) bhavva satta-sīsa-gaṇāṇaṃ vā hiyamāyaraṃti āyariyā|
(14) pāṇa-pariccāe vi u puḍhavādīṇaṃ samāraṃbhaṃ nāyaraṃti nāyaraṃbhaṃti, nānujāṇaṃti vā āyariyā
(15) sumahāvaraddhe vi na kassaī manasā vi pāvamāyaraṃti tti vā āyariyā|
(16) evamete nāma-ṭhavaṇādīhiṃ anegahā pannavijjaṃti|
(17) tahā-susaṃvuḍāsava-dāre-mano-vai-kāya-jogatta-uvautte, vihiṇā sara-vaṃjana-mattā-biṃdu-payakkhara-visuddha-duvālasaṃga-suya-nāṇajjhayaṇa-jjhāvaṇeṇaṃ paramappaṇo ya mokkhovāyaṃ jjhāyaṃti tti uvajjhāe|
(18) thira-pariciyamaṇaṃta-gama-pajjava-tthehiṃ vā duvālasaṃgaṃ suyaṇāṇaṃ ciṃtaṃti nusaraṃti, egagga-māṇasā jhāyaṃti tti vā uvajjhāe|
(19) evamete hi anegahā pannavijjaṃti|
(20) tahā–accaṃta-kaṭṭha-ugguggayara-ghoratava-caraṇāi-anegavaya-niyamovavāsa-nānābhiggaha-visesa-saṃjama-parivālaṇa-sammaṃ-parisahovasaggāhiyāsaṇeṇaṃ savva-dukkha-vimokkhaṃ mokkhaṃ sāhayaṃti tti sāhavo|
(21) imāe cūlāe bhāvijjai
(22) etesiṃ namokkāro|
(1) eso paṃca namokkāro kiṃ karejjā
(2) savvaṃ pāvaṃ nāṇāvaraṇīyādi-kamma-visesaṃ taṃ payariseṇaṃ disodisaṃ nāsa-yai savva-pāva-ppaṇāsaṇo|
(3) esa cūlāe paḍhamo uddesao| eso paṃca namokkāro savva-pāva-ppaṇāsaṇo|
(4) kiṃ viheu maṃgo nivvāṇa-suha-sāhaṇekka-khamo samma-ddaṃsaṇāi ārāhao ahiṃsā-lakkhaṇo dhammo, taṃ me lāejja tti maṃgalaṃ
(6) mamaṃ bhavāo saṃsārāo galejjā tārejjā vā maṃgalaṃ|
(7) baddha-puṭṭha-nikāiya-ṭṭhappagāra-kamma-rāsiṃ me gālejjā vilejje tti vā maṃgalaṃ
(8) eesiṃ maṃgalāṇaṃ annesiṃ ca maṃgalāṇaṃ savvesiṃ|
(9) kiṃ paḍhamaṃ ādīe arahaṃtāīṇaṃ thuī ceva havai maṃgalaṃ ti|
(1) esa samāsattho vittharatthaṃ tu imaṃ| taṃ jahā–
(2) te ṇaṃ kāle ṇaṃ te ṇaṃ samae ṇaṃ goyamā je kei puvviṃ vāvaṇṇiya -saddatthe arahaṃte bhagavaṃte dhamma-titthakare bhavejjā, se ṇaṃ paramapujjāṇaṃ pi pujjayare bhavejjā, jao ṇaṃ te savve vi eyalakkhaṇa-samaṇṇie bhavejjā| taṃ jahā–
(3) aciṃta-appameya-niruvamānanna-sarisa-pavara-varuttama-guṇohāhiṭṭhiyatteṇaṃ tiṇhaṃ pi logāṇaṃ saṃjaṇiya-garuya-mahaṃta-mānasānaṃde|
(4) tahā ya jammaṃtara-saṃciya-garuya-punna-pabbhāra-saṃviḍhatta-titthayara-nāma-kammodaeṇaṃ dīhara-gimhāyava-saṃtāva-kilaṃta-sihi-ulāṇaṃ vā paḍhama-pāusa-dhārā-bhara-varisaṃta-ghana-saṃghāyamiva parama-hiovaesa-payāṇāiṇā ghana-rāga-dosa-moha-miccha-ttāvirati-pamāya-duṭṭha-kiliṭṭhajjhavasāyāisa- majjiyāsuha-ghora-pāvakammāyava-saṃtāvassa ninnāsage bhavva-sattāṇaṃ|
(5) anega-jammaṃtara saṃviḍhatta-guruya-punna-pabbhārāisaya-baleṇaṃ samajjiyāula bala-vīrie sariyaṃ-satta-parakkamāhiṭṭhiyataṇū|
(6) sukaṃta-ditta-cāru-pāyaṃgu-ṭṭhagga-rūvāisaeṇaṃ sayala-gaha-nakkhatta-caṃdapaṃtīṇaṃ, sūrie iva payaḍa payāva-dasa-disi-payāsa-vipphuraṃta-kiraṇa-pabbhāreṇa niya-teyasā vicchāyage sayala savijjā-hara-narāmarāṇaṃ, sadeva-dānaviṃdāṇaṃ suralogāṇaṃ|
(7) sohagga-kaṃti-ditti-lāvanna-rūva-samudaya-sirie, sāhāviya-kammakkhaya-janiya-divva-kaya-pavara-niruvamāṇanna-sarisa-visesa sāisayāi-sayasayala kalā-kalāva-vicchaḍḍaparidaṃsaṇeṇaṃ|
(8) bhavaṇavai-vāṇamaṃtara-joisa-vemāṇiyāhamiṃda- saiṃdaccharā- sakinnara- nara- vijjāharassa sasurāsurassā vi ṇaṃ jagassa|
(9) aho aho aho ajja adiṭṭhapuvvaṃ diṭṭhamamhehiṃ iṇamo savisesāula-mahaṃtāciṃta-parama-ccheraya-saṃdohaṃ sama-gāla mevegaṭṭhasamuiyaṃ diṭṭhaṃ ti
(10) takkhaṇuppanna-ghana-niraṃtara-bahalamappameyāciṃta-aṃtosaharisa-pīyāṇurāyavasa-paviyaṃbhaṃ- tānu samaya-ahinavā-hinava-pariṇāma-visesatteṇaṃ;
(11) maha maha mahaṃ ti jaṃpira-paropparāṇaṃ visāyamuvagayaṃ, ha ha ha dhī dhiratthu adhannā apuṇṇā vayaṃ ii niṃdira-attānagama
(12) naṃtara-saṃkhuhiya-hiyaya-mucchira-suladdha-ceyaṇa sunna-vunna-siḍhiliya-sagatta-āuṃcaṇa-pasāraṇā-ummesa-nimesāi-sāririya-vāvāra-mukka-kevalaṃ
(13) anovalakkha-khalaṃta-maṃda-maṃda-dīha-hūhuṃkāra-vimissa-mukka-dīhuṇha-bahala-nīsāse-gatteṇaṃ aiabhiniviṭṭha-buddhī-sunicchiya-manassa ṇaṃ
(14) jagassa
(15) kiṃ puna taṃ tavamanuceṭṭhemo jeṇerisaṃ pavarariddhiṃ labhejja tti taggaya-manassa ṇaṃ
(16) daṃsaṇā ceva niya-niya-vacchatthala-nihippaṃta-karayaluppāiya-mahaṃta mānasa-camakkāre|
(1) tā goyamā ṇaṃ evamāi-anaṃta-guṇagaṇāhiṭṭhiya-sarīrāṇaṃ tesiṃ sugahiya-nāmadhejjāṇaṃ arahaṃtāṇaṃ bhagavaṃtāṇaṃ dhammatitthagarāṇaṃ saṃtie guṇa-gaṇoharayaṇa-saṃdodoha-saṃghāe
(2) ahannisāṇusamayaṃ jīhā-sahasseṇaṃ pi vāgaraṃto suravaī vi annayare vā keī caunāṇī mahāisaīya-chaumattheṇaṃ sayaṃbhuramaṇovahissa va vāsa-koḍīhiṃ pi no pāraṃ gacchejjā
(3) jao ṇaṃ aparimiya-guṇa-rayaṇe goyamā arahaṃte bhagavaṃte dhammatitthagare bhavaṃti
(4) tā kimitthaṃ bhannau jattha ya ṇaṃ tiloga-nāhāṇaṃ jaga-guruṇaṃ bhuvaṇekka-baṃdhūṇaṃ telokka-lagganakhaṃbha-pavara-vara-dhammatitthaṃkarāṇaṃ kei suriṃdāi-pāyaṃguṭṭhagga-ega-desāo anegaguṇagaṇālaṃkari-yāo bhatti-bharaṇi-bbharikka-rasiyāṇaṃ,
(5) savvesiṃ pi vā surīsāṇaṃ anega-bhavaṃtara-saṃciya-aniṭṭha-duṭṭha-ṭṭhakamma-rāsī-janiya-dogacca-domanasādi-dukkha-dāridda-kilesa-jamma-jarā-maraṇa-roga-soga-saṃtāvuvvega-vāhi-veyaṇāīṇaṃ khayaṭṭhāe ega-guṇassānaṃta-bhāgamegaṃ bhaṇamāṇāṇaṃ jamaga-sama-gameva diṇayarakare i vāṇega-guṇa-gaṇohe jīhagge vi phuraṃti,
(6) tāiṃ ca na sakkāsiṃdā vi devagaṇā samakālaṃ bhāṇiūṇaṃ, kiṃ puna akevalī maṃsa-cakkhuṇo
(7) tā goyamā ṇaṃ esa etthaṃ paramatthe viyāṇeyavvaṃ| jahā–ṇaṃ jai titthagarāṇaṃ saṃtie guṇa-gaṇohe titthayare ceva vāyaraṃti, na uṇa anne, jao ṇaṃ sātisayā tesiṃ bhāratī|
(1) ahavā goyamā kimettha pabhūya-vāgaraṇeṇaṃ
(2) sāratthaṃ bhannae| taṃ jahā–