Uttarajjhayana v28.p253

v28.p253

mukkhamaggaṃ pavannesu, sāhūsu baṃbhayārisu | ahiatthaṃ nivāriṃto, na dosaṃ vattumarihasi ||
vṛ. etadarthastu prāya: sampradāyādavaseya iti tāvat sa evocyate- caṃpānayarīe dahivāhaṇo rāyā, ceḍagadhūyā paumāvatī devī, tīse dohalo- kihāhaṃ rāyannevattheṇa nevatthiyā ujjāṇakāṇanāṇi viharejjā ?, sā ullagasarīrā jāyā, rāyā pucchati, tādhe rāyā ya sā ya jayahatthimi ārūḍhā, rāyā chattaṃ dharei, gayā ujjāṇaṃ, paḍhamapāusaṃca, sīyalaeṇaṃ maṭṭiyāgaṃdheṇaṃ hatthī abbhāhato vanaṃ saṃbharati, niyaṭṭo vanābhimuho payāto, jano na tarati olagiuṃ, dovi aḍavi pavesiyāī, rāyā vaḍarukkhaṃ pecchai, devi bhaṇar̤a - eyassa vaḍassa hedreṇa jāhittiti tā tumaṃ sākhaṃ geṇhejjāsi, tāe paḍisuyaṃ, na tarati, rāyā dakkho tena sāhā gahiyā, so uttinno, nirānaṃdo gato caṃpaṃ |
-
sāvi ya itthiyā nīyā nimmānusaṃ aḍaviṃ, jāva tisāyito pecchati dahaṃ mahatimahālayaṃ, tattha oinno abhiramati hatthī, imāvi saṇiyaṃ 2 uinnā talāgāto, na disāto jāṇai ekkāe disāe sāgaraṃ bhattaṃ paccakkhāittā pahāviyā, jāva dūraṃ gayā tāva tāvaso diṭṭho, tassa mūlaṃ gayā, abhivātito, pucchati-kato'si ammo ihaṃ āgayā ?, tāhe kahei - ahaṃ ceḍagassa dhūyā, jāva ihaṃ hathiṇā āṇīyā, so ya tāvaso ceḍaganiyallato, tena āsāsiyā mā bīhehitti, tāhe se vanaphalāni dāūṇaṃ ekkāe disāe aḍavīo nīṇiyā, ettohiṃto halacchittā bhūmī taṃ na akkamāmo, eso daṃtapurassa visato daṃtacakko rāyā, tāto aḍavīto niggayā, dantapure ajjāṇaṃ mūle pavvaiyā, pucchacchiyāe gabbho na akkhāto, pacchā masāṇapāno, tena gahito, bhajjāe appito, avakinatotti nāmaṃ kayaṃ, sā ajjā tīe pāṇīe samaṃ metti karei, sā ajjā tāhi saṃjaīhiṃ pucchiyā kahiṃ gabbho ?, bhaṇai - mayago jāto, tā me ujjhito, so tattha saṃvaḍḍhati | tāhe dāragarūvehiṃ samaṃ ramai, so tāṇi ḍikkarūvāṇi bhaṇai - ahaṃ tubbhaṃ rāyā mamaṃ karaṃ deha, so lukkhakacchūe gahito, tāni bhanai-mamaṃ kaṃḍūgraha, tāhe se karakaṃḍutti nāmaṃ kayaṃ, so tāe saṃjaīe anuratto, sāya se moyae dei, jaṃ ca bhikkhaṃ laṭṭha lahei |
uttarādhyayana- mūlasūtram - 1-9/228
so susā rakkhati, tattho do saṃjayā taṃ masāṇaṃ keṇati kāraṇena atigatā, jāva ettha vaṃsakuḍaṃge daṃḍagaṃ pecchaṃti, tattha ego daṃḍalakkhaṇaṃ jāṇati, so bhagati - jo eyaṃ daṃḍagaṃ giṇhati so rāyā hotitti, kiṃtu paḍicchiyavvotti jāva annāṇi cattāri aṃgulāṇi vaḍḍhati tāhe joggotti | taṃ teṇaṃ māyaṃgaceḍaeṇaṃ suyaṃ, ekkeṇa dhijjāieṇa ya, tādhe so dhijjāiyigo appasāgāriyaṃ tassa cauraṃgulaṃ khaṇiūṇa chiṃdei, tena ya ceḍaeṇa diṭṭho, so uddālio, so tena dhijjāieṇa karaṇaṃ nīto bhai - dehi daṃḍagaṃ, so bhaṇai - mama masāṇe, na demi, dhijjāio bhaṇaoannaṃ giṇha, so nicchai, bhaṇati ya eeṇa mama kajjaṃti, so dārago na dei, tāhe so dārago pucchio - kiṃ na dehi ?, bhaṇaī ya- ahaṃ eyassa daṃḍagassa pahāveṇa rāyā hohāmitti, tāhe kāraṇiyā hasiuṇaṃ bhaṇaṃti-jayā tumaṃ rāyā hojjāsi tayā eyassa tumaṃ gāmaṃ dejjāsi, paḍivaṇṇo so, tena dhijjāieṇa anne dhijjāiyā gahiyā - jahā eyaṃ mārittā harāmo, taṃ tassa piyāe suyaṃ, tāni tinnivi naṭṭāṇi jāva kaṃcanapuraṃ gayāṇi | tattha rāyā marai aputto, āso ahiyāsito, tassa bāhiṃ suyaṃtassa mūlaṃ āgao, payāhiṇīkāūṇa ṭhito, jāva nāyarā picchaṃti lakkhaṇajuttaṃ,