Meghaduta 2.40

2.40

śabdākhyeyamiti || he abale, yaste priyaḥ sakhīnāṃ purastādagre ānanasparśe tvanmukhasaṃparke lobhāddhāṣṭaryyāt | adharapānalobhādityarthaḥ | śabdākhyeyaṃ śabdena raveṇākhyeyamuccairvācyamapi yattat | vacanamapīti śeṣaḥ | karṇe kathayituṃ lolo lālaso'bhūtkila || "lolupo lolubho lolo lālaso lampaṭo'pi ca" iti yādavaḥ || śravaṇaviṣayaṃ karṇapathamatkrāntaḥ | tathā locanābhyāmadṛṣṭaḥ | atidūratvādadraṣṭuṃ śrotuṃ ca na śakya iti bhāvaḥ | sa te priyaḥ | tvāmutkaṇṭhayā viracitāni padāni suptiṅantaśabdā vākyāni vā yasya tattathoktam || "padaṃ śabde ca vākye ca" iti viśvaḥ || idaṃ vakṣyamāṇaṃ "śyāmāsvaṅgam" ityādikaṃ manmukhenāha | manmukhena sa eva brūta ityarthaḥ ||
sādṛśyapratikṛtisvapnadarśanatadaṅgaspṛṣṭasparśānīti catvāri virahiṇāṃ vinodasthānāni | tathā coktaṃ guṇapatākāyām-"viyogāvasthāsu priyajanasadṛkṣānubhavanaṃ tataścitraṃ karma svapanasamaye darśanamapi | tadaṅgaspṛṣṭānāmupanatavatāṃ darśanamapi pratīkāro'naṅgavyathitamanasāṃ ko'pi gaditaḥ" iti | tatra sadṛśavastudarśanamāha-