Meghaduta p106

p106

athānubhūtojjayinīrasacaritārthasyāsyānantarakaraṇīyamāha— tāmiti | tāṃ yā parameśvarasevāyai pratipālitā nītabhūyiṣṭhā ca tām | kasyāṃciditi, sarvatra vāsasaukhyaṃ dyotayati | bhavanavalabhau gṛhaviṭaṅkāyām | athavā bhavanakūṭeṣu | 'kūṭākāraṃ tu valabhiḥ' iti vaijayantī | suptapārāvatāyāṃ sukhasuptānāṃ kalaravāṇāmanupamardenetyarthaḥ | athavā tatsavarṇatayā kaiścidapyaparijñāta iti | rātriṃ nītvā na punaḥ khedaṃ nītvā, khedanayanasya pūrvamevoktatvāt; rātrinayanameva tadānīṃ tavāpekṣitamiti bhāvaḥ | ciravilasanāt mārgapradarśanasaṃrambheṇa cirakālaparisphuraṇāt | khinnavidyutkalatra: pariśrāntā vidyudrūpā bhāryā yasya; bhavataḥ śramābhāve'pi tadarthamapi kaścidviśramo yukta iti bhāvaḥ | sūrye dṛṣṭa iti, na tvaruṇodayamātre; anena taruṇakiraṇakavalitatamasi gaganasaraṇimaśiśiramahasi samupasarati sati divasamukhavitatatalitavividhacaritamadhikaruciramavanipanagaraṃ tadatikutukamanubhūyaiva gantavyamiti dyotyate | punarapi ujjayinīmahākāladarśanotsavanivṛtto'pīti, punaḥśabdo vyāvṛttau | 'punaraprathame praśne vyāvṛttāvavadhāraṇe' iti vaijayantī | prastutasya mārgasya bhūyo'pi gamanamityartho na ghaṭate, śeṣaśa-