Meghaduta p247

p247

patnīti śoko'pi tvadvirahe vartata iti dyotyate; 'patnī naṣṭeti śokena priyeti madanena ca' iti śrīrāmāyaṇokteḥ| ataśca tava dharmapatnyāḥ samāśvāsanamavaśyakartavyameva tasyeti dyotyate| mitraṃ suhṛdam, īdṛśeṣu kāryeṣu mitrāṇāmevādhikṛtatvāt| teṣāmapyapaṇḍitatvānātmavittvādidoṣavattvādapriyatve vāhyatvamāśaṅkyāha— priyamiti| nirdoṣo'yamiti māṃ hṛdayanirviśeṣaṃ manyamānaḥ paramamantreṣvantaraṅgīkarotītyarthaḥ, 'nāsuhṛtparamaṃ mantraṃ bhāratārheti veditum| apaṇḍito vāpi suhṛtpaṇḍito vāpyanātmavān' iti mahābhāratokteḥ| avidhave jīvannṛtuke ityāmantraṇenaiva tava prāṇasamo jīvatyeva, na khalu tajjīvite tvayā śaṅkā kartavyeti tasyā hṛdayamavasthāpayati; sati dharmiṇi dharmaścinyanta ityanyeṣāṃ viśeṣāṇāmatvarayaiva vaktavyatvāt| viddhi vijānīhi| ambuvāhamiti, svabhāvata eva paropakāraikaparatvaṃ dyotayan, viśvāsyatāmātmanaḥ prakāśayati| atha kiṃ tanmitratvamātreṇa maharṣiṇāgata iti cettatrāha— tatsaṃdeśāt tadīyāt tvadviṣayātsaṃdeśā ddetoḥ| manasi nihitāt na tu lekhārpitāt| anena mama nisṛṣṭārthatāmātmatāṃ cāvagamya manmukhe tena datto mayā cāvadhānena hṛdaye nikṣipta iti dyotyate| tvatsamīpam āgataṃ tvaddarśanameva pradhānaprayojanatvenoddiśya dūradeśādāgatam, na punarānuṣaṅgikatvaddarśanārthamityanena taddarśanasya gauravaṃ dhvanitam| acirācca tvayā saha taṃ ghaṭayiṣyāmīti dyotayan, ātmano virahijanasaṃghaṭanavyāpārasāmarthyamāha— ya iti| bṛndāni samūhān| anena vividhakāryavyagracetasāmanekeṣāṃ janānāṃ tattatkāryopekṣaṇena saṃbhūya nivartanaṃ sūcitam| tvarayati śīghragamanāya prerayati| pathi śrāmyatāṃ