Meghaduta p84

p84

atha gṛhītasalilasya vyayasthalaṃ vacovaicitryā sūcayati— veṇīti | tridhā pañcadhā vā vibhajya dorākāreṇa grathitaḥ keśakalāpo veṇī | salilasya pratanutvāt veṇītvopapattiḥ | 'veṇī tu keśabandhe jalasrutau' iti vaijayantī | veṇīdhāraṇaṃ ca virahiṇīnāṃ prasiddham | tāṃ nirvindhyām | sindhuriti nāmnā prasiddhā kāpi nadī | pāṇḍucchāyā dhavalaśobhā | tattvaṃ dayitaviyoge taddarśanotkaṇṭhitāyā bhavati; yathā ratnāvalyām— 'uddāmotkalikāṃ vipāṇḍurarucaṃ prārabdhajṛmbhāṃ kṣaṇādāyāsaṃ śvasanodgamairaviralairātanvatīmātmanaḥ | agrodyānalatāmimāṃ samadanāṃ nārīmivānyāṃ dhruvaṃ paśyankopavipāṭaladyutimukhaṃ devyāḥ kariṣyāmyaham ||' ityatra vipāṇḍararucamiti | taṭaruhatarubhraṃśibhiḥ tīrajātebhyastarubhyo vigalanaśīlaiḥ | jīrṇaparṇaiḥ vipākapāṇḍubhiḥ patraiḥ | saubhāgyaṃ ramaṇīyavallabhatvam | subhageti | yaḥ sarvasyāpi subhagaḥ, tasmiṃstvayi tasyāḥ prārthanā śobhata eveti bhāvaḥ |