Meghaduta p85

p85

virahāvasthayā viyoge bhavantyā svadaśayā| vyañjayantī na kevalaṃ manasā nirūpayantī, api tu trapānāśalakṣaṇena daśāntareṇa sarvajana-sākṣikaṃ prakāśayantītyarthaḥ| kārśyaṃ jalahīnatām, śarīratanutāṃ ca| yena vidhinā vidhīyata iti vidhiḥ karma, yena karmaṇā varṣa-ṇākhyena, samāgamarūpeṇa ca| tvayaivopapādyaḥ asminnarthe na tu kaścidanya upāyaḥ, 'smarajvaraścikitso hi dayitāliṅganāmṛtaiḥ' ityuktatvāt; tathā ca śrīmahābhārate—'mitaṃ dadāti hi pitā mitaṃ bhrātā mitaṃ sutaḥ| amitasya tu dātāraṃ bhartāraṃ kā na pūjayet||' iti| vṛṣṭikāryasyāpi kartrantarābhāvādityarthaḥ| atra pravāsāvasāne virahavidhuritāyā: priyāyā: paribhogo rasasya parā kāṣṭheti dyotyate, yathāha kavivallabhaḥ—'pravāsānte pāṇḍumukhīṃ kṣāmāmupacitasmarām| divasānnirviśeḥ kāṃścidakarkaśatarāṃ priyām||' iti| atra samāsoktiralaṃkāraḥ|