Meghaduta p90

p90

daśakumāracarite— 'tribhuvanasargasthitisaṃhārasaṃbandhinībhiḥ kathābhiḥ pratyānīyamānarāgapūrā nyarūpayat' iti | 'catuścāṭuḥ priyaṃ vākyam' ityamaraḥ | atra tāramadhurāṇāṃ sārasarasitānāṃ manmathoddīpanatvena tarjanakatvātsukhaśītalatvam, kaṣāyatvātsauramyam, ajñānukūlatvānmāndyaṃ ca vāyuguṇāḥ prakāśitāḥ | kiṃ ca sarasasajjanavallabhatvāt, rasanaṃ śabdanaṃ tatsahitatvādvā, sārasāḥ vandinaḥ, teṣāṃ kūjitaṃ lakṣaṇayā stutigītimaṅgalaṃ svasaṃnidhānena tāraṃ kurvan | kamalāmodasaddaśāmodaviśiṣṭaśceti priyatame'pi yojyam | strīṇāṃ priyatamānukūlyaprārthanayā sāntvaprayokteti vāte'pi | pratyūṣeṣvityanena sakalasamṛddhibhājanatayā pravṛttyantaravyagratābhāvātprabaloddīpanasaṃnidhānācca paurāṇāmaviratarasikatvaṃ dhvanitam; śiprāvāta ityanena sarvartusukheṣu tattaṭodyāneṣu viharaṇaśaraṇatvaṃ ca; tathā raghuvaṃśe— 'anena yūnā saha pārthivena rambhoru kaccinmanaso ruciste | śiprātaraṅgānilakampitāsu vihartumudyānaparaṃparāsu' iti lokottareṇa rūpeṇa śiprātaṭodyānānāṃ paramoddīpanatvaṃ dhvanitam | atropamā sahoktiralaṃkāraḥ |