Meghaduta p97

p97

nāvakāśa iti bhāvaḥ | mahākālamiti sthānasya saṃjñā, 'asau mahākālaniketanasya vasannadūre kila candramauleḥ | tasminnapakṣe'pi saha priyābhirjyotsnāvato nirviśati pradoṣān ||' ityuktatvāt | ta iti 'kṛtyānāṃ kartari vā' iti ṣaṣṭhī | tāvadityadhyāhāryam, yāvadityukteḥ | nayanaviṣayaṃ netragocaraṃ deśam | yāvatsūryāstamayamavasthānasya mahāphalapratipādanenāvaśyakartavyatāmāha— kurvanniti | saṃdhyābaliḥ sāyaṃsaṃdhyākālapūjopahāraḥ | 'baliḥ pūjopahāre ca daityabhede kare'pi ca' iti vaijayantī | paṭahaḥ ānakavādyaviśeṣaḥ | 'ānakaḥ paṭaho jñeyaḥ' ityamaraḥ | śūlina iti | tīkṣṇataradaṇḍasādhanaviśiṣṭatvokterjagadaṇḍadaṇḍadharasya khaṇḍaparaśoḥ prasāde jagata eva prasāda iti bhāvaḥ; 'brahmāṇḍasyādhipatyaṃ hi śrīkaṇṭhasya na saṃśayaḥ | na sa cedīśatāṃ kuryājjagatāṃ kathamīśvaraḥ ||' iti, 'vṛkṣasya mūle sekena śākhāḥ puṣpyanti vai yathā | śivasya pūjayā tadvatpuṣpatyasya vapurjagat ||' iti ca vāyūkteḥ | ata eva ślāghanīyāṃ sajjanapraśaṃsāyogyām | āmandrāṇāṃ gambhīrāṇām | 'mandro gambhīra ucyate' ityamaraḥ | avikalam anyūnam, 'kartuṃ yacca' ityādinā pūrvamapi phalavattvoktau tasyaihikakṣudraphalarūpatvādavikalatvaṃ nāsti; adya tu parameśvaraprasādahetutvādavikalaphalalābha iti bhāvaḥ; 'tasmin prasanne kimihāstyalabhyaṃ dharmārthakāmairalamalpakāste | samāśritāṅghritaroranantāniḥsaṃśayaḥ pakvaphalaprapākaḥ ||' iti śrīviṣṇupurāṇavacanāt | rūpakamalaṃkāraḥ, balipaṭahatvenāsya rūpitatvāt | atiśayoktirvā, adhyavasāyāt | athavā paṭahakaraṇasya asaṃbandhādupamāparikalpakatvena nidarśanā ||