Meghaduta p98

p98

athāsyānaṅgaripusevāyāmānuṣāṅgikaṃ phalāntaramāha— pādeti | pādanyāsakvaṇitaraśanāḥ parameśvarasya pradoṣayātrānurūpaṃ caraṇasaṃcaraṇena raṇitamaṇimekhalāḥ | tatra mahākāle | līlāvadhūtaiḥ vilāsamṛdusaṃcāritaiḥ | ratnacchāyākhacitabalibhiḥ daṇḍapratyuptavajrādiratnaprabhāpaṭalāvakuṇṭhitamūlamadhyāgragataśilparekhaiḥ | athavā ratnaprabhānuviddhamadhyabalitrayaiḥ | cāmaraiḥ sevārthaiścamarībālyajanaiḥ | līlāvadhūtaiḥ krāntahastā iti, vegāvadhūtaistu kīdṛśī daśā bhāvinīti teṣāṃ saukumāryātiśayacamatkāro dhvanyate | veśyāḥ parivāravanitāḥ | nakhapadasukhān navīnānāṃ nakhapadāṅkānāṃ vedanānivārakatvena sukhakarān | sukhaśabdo guṇini guṇe'pi ca vartate; yathā raghuvaṃśe— 'diśaḥ prasedurmaruto vavuḥ sukhāḥ' iti | agrabindūn prathamajalakaṇān, anyeṣāmudvegajanakatvāt | āmokṣyanti ābharaṇaṃ kariṣyanti, āmocanasya pariṣkāraparyāyatvāt; yathā raghuvaṃśe— 'āmuñcatīvābharaṇaṃ dvitīyam' iti, 'āmumoca tanucchadam' iti ca | madhukaraśreṇidīrghān bhramaramālāvadāyatān, sāhacaryāt snigdhaśyāmalānityapi pratīyate; 'dharmayorekataranirdeśe'nyasaṃvitsāhacaryāt' iti lakṣaṇāt | kaṭākṣān apāṅgabhāganirgatānnayanamarīcinicayān, teṣāṃ sākāṅkṣanirīkṣaṇādapi