Gitagovinda 24.2

24.2

avāṅmukhasya śivasya adhikaḥ pāṭhaḥ bhālavilocanaprativimbasamvalite vakṣasi priyāpādālaktaccharaṇamutprekṣya āha- tavedamiti| athavā līlāviśeṣavaśena sarvamidaṃ vāstavikameva| he aruṇacchāya! = durnirīkṣatvāt sūryatejaska! aruṇaprativimbakarā!, yadi vacasā na pratyeṣi, tadā prativimbe'pyāruṇyamudīkṣyatāmitibhāvaḥ| tava hṛdayaṃ mama kimapi lajjāṃ janayati = lajjārūpamañjanaṃ karoti, ācaṣṭe vā, yatheṣṭaṃ draṣṭuṃ na pāryate itibhāvaḥ| kīdṛśyāḥ? praṇayabharabhaṅgena śokādapi paśyantyāḥ premabhaṅgajanitaduḥkhaṃ santyajya kīdṛśamidamiti paśyantyāḥ kitavatvadāyāḥ, yasyāḥ sakāśāt kaitavamidaṃ bhavatā śikṣitam, tasyāḥ ālokaḥ = dyotaḥ, kitaveti sambodhanaṃ vā| tvasyā = anyasyā, ālokaḥ = anyakalatrasyāloko vā| tvatvacchabdāvanyārthakau| anyat spaṣṭam| idaṃ kṛṣṇapakṣe'pi samañjasam|
śaśilekhā śivapakṣe'pyevam¹| athavā kucakayoḥ = navodgatayoḥ, tava stanayoḥ lasati = krīḍati, saṃśliṣyati vā yastam | kucakayoḥ = stanaparvatayoḥ iti vā| kiṃ viphalīkuruṣe? vigataṃ phalaṃ = lābho, yasya tādṛśam, kimiti karoṣi? kīdṛśam? tālaphalādapi = śīladhanādapi, guruṃ = prabhutvādinā tasya gauravaṃ varttata eva, śīladhanenāpi gurutvamastīti| atisarasaṃ = tvayi nitarāṃ sānurāgam, etādṛśasya prāṇeśvarasya vāñchāvighātena vaiphalye vidhīyamāne svasyaiva viphalatā bhavatītibhāvaḥ|
'tāla-karatale'ṅguṣṭhamadhyamābhyāñca sammite| śīle kālakriyāmāne karāsphāle drumāntare' iti|
'phalaṃ jātīphale matsye hetūtthe vyuṣṭilābhayoriti' ca medinī|
ayamarthaḥ kṛṣṇapakṣe'pi|