Gita Govinda 34.3

34.3

punaḥ kiṃbhūtam | anaṅganivāsaṃ kāmāśrayam | iti dhruvaḥ || atha padāni | kiṃbhūtaṃ harim | rādhāvadanavalokanena vikasitā ullasitā vividhā vikārāṇāṃ sāttvikabhāvānāṃ vibhaṅgā yatra | etena rādhāmurudarśanādakramameva stambhādayaḥ prādurbhūtā ityarthaḥ | kamiva | jalanidhimiva | kiṃbhūtaṃ jalanidhim | vidhumaṇḍaladarśanena taralitā lalitā manoharāstaraṅgā yatra | atra maṇḍalagrahaṇaṃ samudravṛddhihetutvaṃ jñāpayati |
api ca | taraleti | kiṃbhūtaṃ harim | taraladṛgañcalacalanena manoharaṃ yadvadanaṃ tena janito ratirāgo yena | anena kāntā dṛṣṭiruktā | yathā- 'āpibantīva dṛśyaṃ yā sā vikāśātinirmalā | sabhrūkṣepakaṭākṣā ca kāntā manmathavarddhanī' | kamiva | taḍāgamiva | kiṃbhūtaṃ taḍāgam | śaradi sphuṭe vikasite kamalodare khelitaṃ khañjanayugaṃ yatra | śaratkāle khañjanavarṇanamucitameva | padme'pi khañjanaṃ milatyeva | taduktam- 'abjeṣu goṣu gajavājimadorageṣu rājyapradaḥ kuśaladaḥ śuciśādvaleṣu' | atra kamalodaragrahaṇena padmāsanaṃ nāma rativiśeṣaḥ sūcitaḥ | yathā- 'jaṅghāyugalasya viparyayataḥ padmāsanamuktamidaṃ yuvateḥ' |