Gita Govinda 19.4

19.4

varamutkṛṣṭam | tatra hetumāha-iha vane'cetanā mūrcchā | yadvā | acetanā mūrchayā jñānarahitā | yadvā | aḥ kṛṣṇastatra cetanā buddhairyasyāstādṛśī | virahānalaṃ virahāgniṃ kimiti viṣahāmi sahe | tathā ca | iha mama duḥkhasya ko'pi jñātāpi netyaraṇyaruditaṃ kimityācarāmīti bhāvaḥ | kīdṛśayham | ativitathaketanātiśayena vitathaṃ mithyābhūtaṃ ketanaṃ gṛhaṃ yasyāstādṛśī | yadvā | ativitathaṃ ketanaṃ śarīraṃ yasyāḥ sā | tathā ca | nirupamasaundaryālayamapīdaṃ śarīraṃ tena vinā viphalamityarthaḥ | ativitathaketanamimaṃ svapatiṃ vihāyānyapuruṣamabhisṛtavaṃtītyevaṃrūpalāñchanaṃ yasyāstādṛśī | tasminmilite lakṣaṇamapīdaṃ na me duḥkhāya syāt | saṃprati tu mṛṣālkṣaṇamātraṃ me duḥkhadamiti bhāvaḥ | 'ketanaṃ lānchane kāye gṛhe copanimantraṇe|' iti viśvaḥ | 'ṣaha marṣaṇe' iti curādyantargaṇayujādau para smaipadī vikalpena ṇijantaḥ paṭhitaḥ | tasya ṇico'bhāve viṣahāmīti prayogaḥ |
ahaheti | adbhute | valayādimaṇibhūṣaṇaṃ kaṭakādimaṇikhacitamalaṅkāraṃ harivirahadahanavahanena kṛṣṇavirahāgnidhāraṇena bahudūṣaṇamanekadroṣaṃ paśyāmi | strīṇāṃ priyāṇyābharaṇāni | tānyapyadhunā bhārabhūtānītyadbhutamiti bhāvaḥ |
tadeva gītena kathayati-smareti | gītasyāsya vasantarāgaḥ | ekatālī tālaḥ | gītārthastu kāpi yuvatirmadhuripuṇā kṛṣṇena vilasati ramate | ata evādhikaguṇā adhikaḥ saundaryādiguṇo yasyāḥ sā | matsaṅketāgamanotsukamapi kṛṣṇaṃ guṇairapahṛtya ramitavatī | matto'pyadhikaguṇeti bhāvaḥ | yuvatī vilasatītyanena kāmikartṛkavilāsakathanādviparītaratamuktam | kīdṛśī | smarasamaraḥ kāmasaṃgrāmaḥ | suratamiti yāvat | tatrocito yogyo viracitaḥ kṛto veśa ābharaṇaṃ yayā sā | punaḥ kīdṛśī | galitaḥ skhalitaḥ kusumabharo yasyāstādṛśī | vilulitāḥ kṛṣṇena kacagrahapūrvakaṃ cumbanādānena srastāḥ keśā yasyāḥ sā | viparītarate ca nāyikāyāḥ keśagrahaṇapūrvakameva
punaḥ kīdṛśī | dayiteti | dayitasya kṛṣṇasya vilokitena vīkṣaṇena lajjitahasite lajjāhrāsye yasyāḥ sā | yadvā dayitavilokite ca lajjitā lajjāvatī hāsyayuktā cetyarthaḥ | puruṣāyamāṇāyāstasyādhaḥsthitasyāṅganāyamānasya kṛṣṇasya