Gita Govinda 21.2

21.2

tibhogalakṣyo'pi nirmayaḥ' iti 36 || saṃprati kṛṣṇena ramamāṇāyāḥ saubhāgyasukhaṃ tadvirahiṇyāśca saṃtāpamaṣṭapadyā kathayati-anileti | gītasyāsya deśākhyarāgo rūpakatālaḥ| gītārthastu he sakhi, yā vanamālinā kṛṣṇena ramitā krīḍitā sā kisalayaśayane pallavaśayyāyāṃ na tapati nopataptā bhavati | kṛṣṇāṅgasaṅge tatsukhapadameva bhavatīti bhāvaḥ | kīdṛśena vanamālinā | anilena vāyunā tarale'nilavadvā tarale cañcale kuvalaye tadvannayane yasya tena | nāyikāsaṃnidhau sādhvasavaśāccañcalanetreṇetyarthaḥ | athavā yā ramitetyatra āśleṣaḥ | tathā ca yā vanamālināramitā sā kisalayaśayane na tapatīti na, api tu tapatyeva | nadvayena prakṛtasyaivārthasya prāpteḥ | yadvā | kisalayaśayanenetyevaṃ tṛtīyaiva | nañ śiraścālane | tathā cāyamarthaḥ | yā ramitā vanamālinā kisalayaśayane na tapati | api tu tapatyeva ceti kākā labhyate | 'anilo vasuvātayoḥ' iti viśvaḥ |
api ca | amṛteti | kiṃbhūtena hariṇā | amṛtavanmadhurataraṃ komalaṃ vacanaṃ yasya tena | sā malyānilena na jvalati na dīpyate | atipriyavacanasya dātā na bhāvaṃ dyotayati | tena 'priyavāk strīśīlaḥ strīṇāṃ bhavati vallabhaḥ' iti vāllabhyanirāsānmano'navasthānānmalayamārutena jvalatyeva |