Gita Govinda 29.6

29.6

vimukhībhāvaṃ tyaja mayi vimukhatāṃ tāvadvimuñca | sumukhyāste vaimukhyamanucitamiti bhāvaḥ | mānaṃ muñca tyaja | he mugdhe, ayaṃ priyo'nākāṅkṣita evopasthita āgataḥ | kīdṛśaḥ | atiśayasnigdho'tiśayena snehavān | tathā ca svayamāgataḥ priyaḥ (iti) hetunocita iti bhāvaḥ |
dṛśāviti | he tanvi, tvaṃ pṛthvīgatā pṛthvyāṃ bhuvi gatā prāptā satī vibudhayauvataṃ devayuvatīsamūhamāścaryeṇa vahasi dhārayasi | tadevāha-dṛśāviti | tava dṛśau netre madālase madena harṣeṇālase manthare | atha ca madālasā svarveśyā | tathā ca svarge ekaiva madālasā tvaṃ tu ekavahe madālase dadhāsītyāścaryamiti bhāvaḥ | tava vadanamindusatyāspadaminduviṣayiṇī yā matistasyāspadaṃ viṣaya ityarthaḥ | tava mukhe'yaminduriti matirbhavati | amaralokānāmindumatī kācana devāṅganā tasyā āśrayaḥ| tava gatirjanānāṃ manoramā manohāriṇī | atha ca manoramā nāmnī yā devāṅganā tadātmikā| athavā ramā lakṣmīstadātmiketyarthaḥ | tathā tavorudvayamūruyugmaṃ vidhutarambhaṃ vidhute svaśobhayā tiraskṛte rambhe kadalayau yena tādṛśam | atha ca rambhā svarveśyā svarge ekaiva rambhā tvamūrudvayātmakaṃ rambhādvayaṃ dadhāsīti bhāvaḥ | atha ca tava ratiḥ suratakeliḥ kalāvatī kauśalaśālinī | atha ca tava ratiḥ kāmapatnī | asti kalāvatī nāmnī devāṅganā | te bhruvau