Gita Govinda 33.5

33.5

jñātaṃ gaurapītaṃ dukūlaṃ paṭṭavastraṃ yena tam | kimiva | nīlanalinamiva śyāmakamalamiva | kīdṛśaṃ nīlanalinam | pīto yaḥ parāgaḥ puṣparejastasya paṭalaṃ samūhastasya yo bharo'tiśayastena valitaṃ veṣṭitaṃ mūlaṃ yasya tādṛśam | atra kṛṣṇasya snigdhaśyāmatayā nīlotpalasāmyam | pītapaṭṭāmbarasya ca mūlalagnapītaparāgasāmyam | 'atha kalevaram | gātraṃ vapuḥ saṃhananam' ityamaraḥ |
punaḥ kīdṛśam | śaśikiraṇeti | śaśikiraṇaiścandrakiraṇaiśchuritaṃ saṃbaddhamudaramabhyantaraṃ yasya tādṛśo yo jaladharo meghastadvatsundarāḥ sukumārāḥ | kusumaṃ puṣpam | tatsahitāḥ keśā yasya tam | atra keśānāṃ śyāmatayā jaladharasāmyam | tatra sthitakusumānāṃ meghāntaritacandrakiraṇasāmyaṃ bodhyam | punaḥ kīdṛśam | timire'ndhakāre uditaṃ prakaṭībhūtaṃ yaccandrabimbaṃ tadvannirmalasya malayajatilakasya niveśo vinyāso yatra tādṛśam | atra kṛṣṇasya gāḍhāndhakārasāmyaṃ lalāṭasthamaṇḍalākṛtitilakasya pūrṇacandrabimbasthitikāle timirasāmyasyāsaṃbhavādabhūtopamā jñeyā |