Gita Govinda 4.7

4.7

kapolatale cāru manoharaṃ yathā tathā cucumba cumbanaṃ kṛtavatī | kīdṛśī | kimapi kāryaṃ lapituṃ mantrayituṃ śrutimūle militā saṃlagnā | kīdṛśe | pulakai romāñcairanukūle priyāvilāsasūcake | autsukyena sahasā kāntamukhacumbanaṃ sakhījanahāsyakaraṃ bhavatīti vyājena tayā tadārabdhamiti bhāvaḥ | atra prathamato mukhasparśanena kṛṣṇakapole romāñcamutpādya cumbane tasyātrādhīratvaṃ dhvanitam |
śliṣyatīti | kāmapi rāmāṃ krīḍāśīlāṃ gopīṃ śliṣyatyāliṅgati, kāmapi cumbati, kāmapi ramayati, nibhṛtaḥ saṃbhogena krīḍayati sa kṛṣṇaḥ smitena cārutaramatiśayena manoharāmaparāṃ gopīṃ paśyati | kāṃcidvāmāṃ vāmasvabhāvāṃ kopavatīmanugacchati anunayārthamanugatiṃ karoti | atra kṛṣṇenāśleṣādau kriyamāṇe'pi tābhirna kṛtamityapyavaidagdhyaṃ sūcitam | 'sundarī ramaṇī rāmā' ityamaraḥ | 'vidhā vāmā api striyām' iti ca |