Gita Govinda 8.8.6

8.8.6

śambhoścaraṇayo ritivat karmaṇi ṣaṣṭhā | dvitīyavyākhyāne tu 'kriyāmātrayoge caturthī vaktavye'ti caturthī | vyākhyānāntaraṃ vā; he tanvi tava hṛdayamasūyayā kāminīkadambabhogalolupam | tiraskārajaniterṣyā khinnamākalayāmi jāne | tarhi tāṃ parityajya tasyāsūyājanitakhedāpākaraṇaṃ kimiti na kriyata ityākāṃkṣāyāmāha tanna vedmīti | asi tvamarthe'vyayam | asi tvaṃ kutaḥ kutra yātā māṃ parityajya kasmiṃścana sthale sthitā tatsthalamahaṃ na vedmi na jāne; tena sthalāparijñānarūpakāraṇena te tvāṃ nānuyāmi anusṛtya nāgato'smi | ajñātasthalagatānasaraṇyāśakyatvāditi bhāvaḥ | atha nirantarabhāvanājanitarādhāsākṣātkāraḥ asannihitā'pi sannihiteva yā, tayā saha saṃlapati dṛśyase iti || he tanvi, me purataḥ mamāgrapradeśe dṛśyase sākṣādvīkṣyase, punaḥ kimarthaṃ gataiva madagrabhāgāvasthānaṃ vihāya anyatra nirgatāsi | atha cāgataṃ punarāgamanameva kimarthaṃ vidadhāsi karoṣi | pureva viprayogāvasthātaḥ pūrvaṃ ivetyarthaḥ | sasaṃbhramaṃ sasantoṣaṃ yathā tathā, parirambhaṇamāliṅganaṃ kiṃ kimarthaṃ, na dadāsi na prayacchasi | agrato dṛśyase, prayojanavaśādanyatrāpi gacchasi | anantaramāgacchasi | athavā purato dṛśyase | atha ca gatāgatameva gamanāgamanameva dvandvaikavadbhāvaḥ | kiṃ kimarthaṃ vidadhāsi, pureva sasaṃbhramaṃ yathā tathā parirambhaṇaṃ kimiti na dadāsi | purato'grataḥ dṛśyase | prayojanavaśādanyatrāpi gacchasi ca | atha ca āliṅganādikaṃ prayacchasi | idānīṃ tu tadvaiparītyaṃ kimiti vidadhāsītyarthaḥ |