Krishnagiti 2.281

2.281

kānakuriñjirāgeṇa gīyate
campatāḷena vādyate
sakalaśamalaharaṇanipuṇapadaparāga te namo'stu
kamanacaraṇakamala paśupate namo'stu te
pallavam
śāradāmbudopamāṅga cārucandrakhaṇḍacūḍa
cāraṇādivandya paśupate namo'stu te
prapadarucibhiradhikasubhagacaraṇakaṭaka te namo'stu
śaradhisadṛśajaṅgha paśupate namo'stu te [ śāra ]
bhuvanasubhagabahaḷasuṣamajānuyugaḷa te namo'stu
suḷaḷitoruyugaḷa paśupate namo'stu te [ śāra ]
jaghanavilasadajinakalitabhujagaraśana te namo'stu
bhuvanabhavanajaṭhara paśupate namo'stu te [ śāra ]
taraḷabahaḷabhujagalubhagabāhuvīra te namo'stu
garaḷagahanakaṇṭha paśupate namo'stu te [ śāra ]
svakaravilasadabhayavaradaparaśuhariṇa te namo'stu
bhuvanakamanavadana paśupate namo'stu te [ śāra ]
adhararucibhiradhikaruciramṛdulahasita te namo'stu
mahitamadhuravacana paśupate namo'stu te [ śāra ]
nayananaḷinayugaḷavigaḷadadhikakaruṇa te namo'stu
bhujagakamanakarṇa paśupate namo'stu te [ śāra ]
vihitamadanadahananiṭilanayanadahana te namo'stu
śirasi lasitasoma paśupate namo'stu te ( śāra )
tuhinaśikhariduhitṛsatatalasitasavidha te namo'stu
nigamavivahavarṇya paśupate namo'stu te ( śāra )
evaṃ deva stuto'sau sapadi paśupatiḥ pāṇinā pāṇipadmaṃ
sāmodaṃ saṃspṛśaṃste sarasamiti jagau sasmitaṃ vismitātmā
prāpyaṃ kiṃ pūrṇakāma praṇatavarada te nūnamenāṃ tapasyāṃ
śasyāṃ tasyātanorme nayanahutatanorudbhavāyātanastvam