Krishnagiti 2.299

2.299

mukhārirāgeṇa gīyate
ekatālena vādyate
dharaṇīramaṇīyamaṇī ramaṇīrupanīya vanī (1) raja raivatake
madanena madena ca mūḍhamanā musalī sa salīlamihāramata
vivido'pi vibho vipadaṃ vidadhannarakānucaro nagare ca gṛhe
sa tadā tu gato'jita raivatakaṃ samalokata taṃ sahayauvatakaṃ
abalā hi vilokya kapiṃ viṭapaṃ calayantamalaṃ balavantamamum
ahasannatha so'pyavaruhya taroraharatsuranātha surākalaśam
upalena balena balena balī nihato'mumavañcayadeṣa javī
sa madī samadīdṛśadīśa gudaṃ halinaṃ lalanākulamadhyagataṃ
sa tu sammukhacillinirāsamukhaiḥ svakṛtairatha nātha nikāraśataiḥ
pratatapratighasya puro halino vyabhinattarasā ca surākalaśam
śasituṃ balato bata garddhitavānmusalaṃ sahalaṃ sahasoddhṛtavān
vivido'pi vibho tarumuddhṛtavān balamūrddhani tāḍitavān balavān
sahasā sa halī sahalīlamamaṃ svahalena hare samare hatavān
sasunandahato'tha balena javāttadihāgaṇayan drumamanyamadhāt
api taṃ kupito'pyabhinanmusalī vipinaṃ vidadhe vivido vitaruṃ
prahatāsu śilāsu hṛtāsu halī samatāḍi kareṇa hare hariṇā
vidhutāyudha āśu kareṇa hare praharan plavagaṃ sa ca jatrutale
narakānugameva vibho vidadhe virujaṃ vitatāna ca viśvamidam
sāmbaṃ jāmbavatīsutaṃ sa kurubhirbaddhaṃ balo dvārakāṃ
ninye hastinapattanācca bhavān sarvaiḥ sahārkagrahe
tīrthāgryaṃ tu samantapañcakamagātsnātvā ca vittānyadāt
sarvairbandhubhirāvṛtaḥ sukhamuvāsātraiva māsatrayam