The Great Epic of the Bhārata dynasty 6.26.72

6.26.72

pratipāditāṃ karmayogaprāpyāṃ sāṅkhyayoganiṣṭhāṃ phalena stuvannupasaṃharati eṣeti | eṣā sthitaprajñalakṣaṇaprasaṅgātkathitā brāhmī | brahmaśabdenātra brahmaviducyate | “brahmavidbrahmaiva bhavati” iti śruteḥ | tasyeyaṃ brāhmī sthitirniṣṭhā enāṃ niṣṭhāṃ prāpya naro na vimuhyati, punarmohaṃ na prāpnoti | asyāmantakāle'pi sthitveti sakṛjjātāpīyaṃ phalavatī | na tūpāsanāvaccirābhyāsasāpekṣetyuktam | brahma ṛcchati prāpnoti | kiṃ lokāntaravadgatiprāpyaṃ brahma ? netyāha - nirvāṇamiti | nirgataṃ vānaṃ gamanaṃ yasminprāpye brahmaṇi tannirvāṇam | tathā ca śrutiḥ “na tasya prāṇā utkrāmantyatraiva samavalīyante brahmaiva san brahmāpyeti” iti | gatimantareṇa prāṇarūpopādhipravilayamātrāddhaṭākāśasya mahākāśatvaprāptivat jīvasya brahmaprāptimāha | antakāle'pītyapiśabdādyo brahmacaryādārabhyātra tiṣṭhati sa brahmanirvāṇaṃ kaimutikanyāyena prāpnotīti gamyate | asyādhyāyasyārthaḥ saṅgṛhīto madhūsūdanaśrīpādaiḥ “jñānaṃ tatsādhanaṃ karma sattvaśuddhiśca tatphalam | tatphalaṃ jñānaniṣṭhaivetyadhyāye'sminprakīrtitam” ||