The Great Epic of the Bhārata dynasty 6.26.71

6.26.71

prāsaṅgikīmāśaṅkāṃ parihṛtya vrajeta kimityasya praśnasyottaramāha - vihāyeti | pūrvoktāṃstrividhānkāmānvihāya yaḥ carati viṣayānbhuṅkte nispṛhaśca | yato nirmamaḥ | mamatāvānhi idaṃ mama bhūyādityanyadhanādyarthaṃ spṛhāṃ karoti na nirmamo'pi | kutaḥ yato nirahaṅkāraḥ | nahyahaṅkāraśūnyasya suptyādau mamatā dṛṣṭā | tasmādahaṅkārapravilayācchāntiṃ mokṣaṃ prāpnoti | atra yaḥ sarvatrānabhisneha iti sarvatra yacchabdadarśanātsādhanavidhipara evāyaṃ granthaḥ | anyathā sthitaprajñasya prakṛtatvāttadanuvādārtho yacchabdo'narthakaḥ prāpnoti | loke'pi hi parasvabhāvakathane sa evaṃ karotīti tacchabda eva prayujyate na tu yacchabdaḥ | vidhau tu ya evaṃ karoti sa idaṃ prāpnotīti dvayorapi prayogo dṛśyate | lakṣaṇakathanārthatve'pi tatra tātparyābhāvādvidhāveva paryavasyatīti dik ||