The Great Epic of the Bhārata dynasty 6.36.13

6.36.13

paramaprakṛtasyākṣarasyopāsakaṃ stauti, tadguṇakathane hi sādhakānāṃ teṣu guṇeṣvādaro bhaviṣyatīti buddhyāha -- adveṣṭeti | adveṣṭā cedudāsīnaḥ syānnetyāha | maitraḥ mitrameva maitro natūdāsīnaḥ kadācidapi | nanvanyasmin śatrau sati kathaṃ maitratvaṃ syāttatrāha -- karuṇa iti | duḥkhadātāramapi karuṇayā na bādhitumīṣṭe apitu trātumevecchati | etena sarvabhūtābhayapradaḥ sannyāsī uktaḥ | ataeva tasya nirmama iti viśeṣaṇaṃ yujyate | mukhyamakṣaravido lakṣaṇaṃ nirahaṅkāra iti | ahaṅkāro hi sarvānarthanidānaṃ sa eva nirgato yasmātsa nirahaṅkāraḥ | ataeva same duḥkhasukhe yasya | “tatra ko mohaḥ kaḥ śoka ekatvamanupaśyataḥ” iti śruteḥ | kṣamī kṣamāvānparibhavaprāptāvapi svasthacittaḥ | anyo'pi mumukṣuretāndharmānanutiṣṭhedityarthaḥ ||