The Great Epic of the Bhārata dynasty 6.42.15

Bhāratabhāvadīpa 6.42.15

Language: Sanskrit

6.42.15

śarīreti | nyāyyaṃ dharmyaṃ śāstrīyam | viparītamanyāyyamadharmyamaśāstrīyam | nanu śarīrādibhistribhirārabhyate ‘pañcaite tasya hetava’ iti ca vipratiṣiddhamucyate | naiṣa doṣaḥ | atrāpi śarīrapadenādhiṣṭhānasya narapadena karturvāṅmana iti karaṇasyārabhata iti ceṣṭānāṃ nyāyyamiti dharmādharmarūpasya daivasya ca saṅgrahāt | sarveṣu karmasu pañcānāṃ samāne'pyupayoge vidhipratiṣedhalakṣaṇaṃ trividhameva karma śāstre prasiddhamiti | idaṃ śārīraṃ karmedaṃ mānasamidaṃ vācikamiti vyapadeśo dehādīnāṃ prādhānyāpekṣa iti na kaścidvirodhaḥ ||

Previous: 6.42.14
Next: 6.42.16
Up: 6.42

Linked texts (1)

Mahābhārata — Vyāsa, Sanskrit