The Recognition of Śakuntalā 10.5.241

10.5.241

vicchedo madhya uddīpanaṃ punarmadhye vicchedaḥ punaruddīpanamiti yattadapi prabandhāṅgirasaparipoṣāpekṣayaiva | taduktaṃ sahṛdayahṛdayavaloke— "uddīpanapraśamane yathāvasaramantarā | prabandhasya rasādīnāṃ vyañjakatve nibandhanam" iti | daśarūpake'pi— "anubhāvavibhāvābhyāṃ sthāyinā vyabhicāribhiḥ | gṛhītayuktaiḥ kartavyamaṅginaḥ paripoṣaṇam | nacātirasato vastu dūraṃ vicchinnatāṃ nayet | rasaṃ vā na tirodadhyādvastvalaṃkārabhūṣaṇaiḥ | eko raso'ṅgīkartavyo vīraḥ śṛṅgāra eva vā | aṅgamanye rasāḥ sarve kuryānnirvahaṇe'dbhutam" iti | atrānye bhayānakahāsyayuddhavīrakaruṇādbhutaraudrabībhatsā aṅgatvenopanibaddhāste tatra tatra prayuktalakṣaṇā anusaṃdheyā iti śivam || nāṭyālaṃkṛtiśāstratattvaviduṣābhijñānaśākuntalavyākhyeyaṃ sarasā niśātamatinā śrīrāghaveṇa sphuṭā | arthadyotanikābhidhā dhvanitadarthālaṃkriyānirmarā śrīviśveśvarapattane viracitā tadbhaktiyuktātmanā | iti śrīmatpadavākyapramāṇapārāvārīṇabhaṭṭaśrīpṛthvīdharātmajaśrīmatpadavākyapramāṇapārāvārīṇasāhityaratnākarasakalakalāśāstrapravīṇabhaṭṭaśrīrāghavaviracitābhijñānaśākuntalavyākhyārthadyotanikābhidhā saṃpūrṇā ||