Shivattvaratnakara 103.36

103.36

phalānyāraṇyakānyeva tasya prītikarāṇi vai
vanyeṣu yādṛśī prītirvartate parameiśatuḥ
uttameṣvapi nāstyeva tādṛkṣu grāmajeṣvapi
na kālaniyamastatra na deśasya sthalasya vā
yatrāsya cittaṃ ramate tatra dhyānena kevalam
svātmanyevaṃ śivepyevaṃ śivasāyujyakāraṇam
atisvalpatarāyuśśrīrbhūteśāṃśādhipo hi yaḥ
sa tu rājāhamasmīti vādinaṃ hanti sānvayam
kartāpi sarvalokānāṃ sumahaiśvaryavānapi
śivaśśivo'hamasmīti vādinaṃ yaṃ ca kaṃ cana
ātmanā saha tādātmyāt kurute bhāginaṃ bhṛśam
upacārānatho vakṣye purāṇaśrutisammatān
upacārāstrayaḥ proktāḥ pañcāṣṭau daśa ṣoḍaśa
dvātriṃśacca caturviṃśatyupacārā gṛhoditāḥ
snānaṃ pūjā ca naivedyamupacārāstrayaḥ smṛtāḥ
pradakṣiṇanamaskārau pañcaite samprakīrtitāḥ
pārthivādyaiśca sadyādipañcamantraissamarcanam
pañcopacāramityuktaṃ brahmaṇā parameṣṭhinā
saṅgītavādyanṛttaistairupacārāṣṭakaṃ mune !
arghyaṃ pādyaṃ cācamanaṃ madhuparkācamau tathā
snānādayo nivedāntā upacārā daśa kramāt
āvāhanāsane pādyamarghyamācamanīyakam
snānamācamanaṃ vastraṃ tathācāmopavītake
ācāmo gandhapuṣpe ca dhūpo dīpaṃ nivedanam
pradakṣiṇaṃ namaskārā ātmanyāropaṇaṃ tathā
upacārāṣṣoḍaśoktāḥ skandenaitai mahātmanā
āvāhanāsane pādyamarghyamācamanīyakam
snānaṃ vastraṃ copavītamakṣatā gandhapuṣpakam
dhūpo dīpaṃ ca naivedyaṃ phalaṃ tāmbūlakaṃ stutiḥ
pradakṣiṇaṃ namaskāro vādyaṃ śayyā ca gītakam
nṛttaṃ cātmāropaṇaṃ ca caturviṃśatirityumī
āvāhanāsane pādyamarghyamācamanīyakam
snānaṃ vastraṃ copavītaṃ bhūṣaṇaṃ cānulepanam
tilākṣatāḥ puṣpadhūpadīpanaivedyakāni ca