Shivattvaratnakara 104.22

104.22

varṇyamānenāśvineva svabalenānudhāvitam
svāmyājñācaṇḍavātena preryamāṇena veginā
jvalantamadhikaṃ bhūyo mahatāmarṣavahninā
senāpradhānamukhyataḥ parājayamavāpayat
tadvalaṃ cānayat sarvaṃ yāvanaṃ śamanālayam
ameyabalapūrṇasya samastadharaṇīśituḥ
yavanādhipatessainyaṃ jetuṃ ko'pyatra na kṣamaḥ
eṣā vijitavatyāsīt sainyaṃ tasyāpi ca svayam
asādhāraṇavikrāntiriyamityakhilaistutā
āsetuhimavatpādaṃ kīrtiṃ prāpa sunirmalām
enāṃ vārtāmupaśrutya yavanādhipatestataḥ
santuṣṭānnāgaturagavāso'laṅkārapūrvakam
sammānaṃ prāpya dharaṇīmapālayadaśātravām
punaḥ kṣudrāṃśca sāmantān galitāhaṃkṛtīn vyadhāt
purātanakṛtān dharmān bhūsurairanvavardhayat
tato viśeṣasevārthaṃ mūkāmbāyāḥ svabhaktitaḥ
bhūmiṃ vitīrya paryāptāṃ svanāmaparicihnitām
agrahāraṃ ca cennāmbāpuramityativiśrutam
nirmāpya kṣitidevānāṃ sadvṛttīḥ parikalpya ca
bhūrudrāṇāṃ kārayitvā maṭhāṃśca subahūn varān
dharmānnūtnāṃściratnāṃśca vardhayantī viśeṣataḥ
vitanvāneṣṭaliṅgārcāṃ tathā śrījaṅgamārcanam
kurvāṇā bhaktitaḥ svīyaiḥ kārayantī ca taddvayam
bhūrudrāṇāṃ ṣaṇṇavatisahasrottaralakṣakam
bhojayāmāsa rucirairbhojyaiṣaḍrasamiśritaiḥ
ānanditānāṃ teṣāṃ ca lebhe bhūyo'pyanugraham
idaṃ sarveṣu dharmeṣu samutkṛṣṭatamaṃ matam
santarpaṇaṃ paraṃ bhaktyā yacchaivānāmabhīpsitaiḥ
tasmādatithimāyāntamabhigacchet kṛtāñjaliḥ
abhyutthānābhigamanaṃ svāgataṃ cāsanaṃ priyam
pādodakamanuvrajya svargasopānasaptakam
āsanābhyañjanasnānavastradhānyāñjanādibhiḥ
pūjayecchivabhaktaṃ yassa yāti paramāṃ gatim
upapātakakoṭyaśca brahmahatyāyutāni ca