Shivattvaratnakara 104.39

104.39

dahatyaśeṣapāpāni śivabhaktasya darśanam
bhaktānāṃ darśanādeva nṛṇāṃ svargādayo dvijāḥ
na durlabhā na sandeho bhaktānāṃ kiṃpunastathā
gaṅgāsnānādikaṃ puṇyaṃ darśanācchivayoginām
sarvatīrthābhiṣekaśca tatsaṃbhāṣaṇamuttamam
śivabhaktamathāyāntaṃ dṛṣṭvāpi sumukhaḥ priyaḥ
praṇāmādi karotyeva mahādevaṃ yathā tathā
sa vai bhakta iti jñeyaḥ punāti ca jagattrayam
manaḥ prasannatāṃ yāti pūjya māheśvaraṃ tathā
akulaḥ kulayuktaḥ syānnamaskārapurassaram
śivabhaktamathāyāntaṃ dṛṣṭvaiva gṛhasaṃsthitāḥ
krīḍantyopathayassarvā yāsyāmaḥ paramāṃ gatim
hastapādādisādharmyānmartyān rudravapurdharān
śivaliṅge śilābuddhiṃ kurvāṇa iva pātakī
sthāvaraṃ jaṅgamaṃ caiva dvividhaṃ liṅgamucyate
jaṅgamasyāvamānena sthāvaraṃ niṣphalaṃ bhavet
śivāśramagato bhaktaśśivabhaktaṃ prapūjayet
svāgatāsanadānena pādyārghyādyabhivādanaiḥ
yastu maheśvaro nityaṃ jātamātropajīvakaḥ
uttamassarvapātrāṇāṃ tasmai dattaṃ yadakṣayam
śivayogiśarīraṃ tu nityaṃ sannihitaśśivaḥ
yogīndraṃ pūjayettasmāt sākṣātsaṃpūjitaśśivaḥ
akalmaṣamatistasmāt pūjayecchivaśāsanam
guṇavatpātrapūjāyā varaṃ śāsanapūjanam
pātraśāsanayormadhye śāsanaṃ tu viśiṣyate
nityaṃ naimittikaṃ kāmyaṃ vimalaṃ ca caturvidham
harasya prīṇanārthaṃ yacchivabhaktyā vidhīyate
dānaṃ tadvimalaṃ proktaṃ kevalaṃ mokṣasādhanam
yugapacchivaliṅgaikyapādaspṛṣṭarajāṃsi ca
patanti mastake yasya sa mukto nātra saṃśayaḥ
pādaprakṣālanaṃ yastu kurute śītalodakaiḥ
vīramāheśvarasyāsau caturambudhirāḍ bhavet
yastu mṛdvāsanaṃ dadyācchivabhaktasya sādaram
dhṛtaliṅgasya sa pumān saptadvīpādhipo bhavet