Shivattvaratnakara 105.13

105.13

yathartu tāni bījāni saṃsiktānyambhasā punaḥ
ucchūnatāṃ mṛdutvaṃ ca mūlabhāvaṃ vrajanti ca
tanmūlādaṃkurotpattiraṅkurāt parṇasaṃbhavaḥ
parnānnālaṃ tataḥ kāṇḍaṃ kāṇḍācca prasavaḥ punaḥ
prasavācca tuṣaḥ kṣīraṃ kṣīrāttaṇḍulasaṃbhavaḥ
taṇḍulācca tataḥ pakvānniṣpantyoṣadhayastathā
yavādyāśśāliparyantāḥ śreṣṭhāssaptadaśa smṛtāḥ
oṣadhyaḥ phalapākāntāśśeṣāḥ kṣudrāḥ prakīrtitāḥ
cyutā lūnā marditāśca śanairutthāya saṃskṛtāḥ
sūryolkhalayantrādyaissthālyāmudakavahninā
ṣaḍvidhāhārabhedena pariṇāmaṃ vrajanti tāḥ
anyonyarasasaṃyogādaneksvādutāṃ gatāḥ
bhakṣyaṃ bhojyaṃ ca peyaṃ ca lehyaṃ coṣyaṃ ca picchilam
iti bhedāstu ṣaṭ proktā madhurādyāśca ṣaḍrasāḥ
tadannaṃ sthūlakavalairgrasairmuktaṃ ca dehibhiḥ
antasthamāśaye pūrvaṃ prāṇaṃ sthāpayate kramāt
apṛthagbhūtamāhāraṃ sa vāyuḥ kurute dvidhā
saṃpraviśyānnamadhye tu pṛthagannaṃ pṛthagjalam
agnerūrdhvaṃ jalaṃ sthāpya tadannaṃ tu jalopari
jalasyādhaḥ svayaṃ prāṇaḥ sthitvāgniṃ dhamayecchanaiḥ
vāyunā dhmāyamāno'gniratyuṣṇaṃ kurute jalam
tadannamuṣṇatoyena samantāt pacyate punaḥ
dvidhā bhavati tatpakvaṃ pṛthakkiṭṭaṃ pṛthagrasam
malairdvādaśabhirbhignaṃ kiṭṭaṃ dehād bahirvrajet
karṇākṣināsikājihvā dantaśiśnagudā nakhāḥ
malāśrayāḥ kaphasvedau viṇmūtre dvādaśa smṛtāḥ