Shivattvaratnakara 26.64

26.64

hariścaṃdro naḷo rājā purukutsaḥ purūravāḥ
sagaraḥ kārtavīryaśca ṣaḍete cakravartinaḥ
gayau'mbarīṣaśaśiśibinduṃragadaḥ
pṛthurmarutto bharatassuhotraḥ
rāmo dilīpaśśiviraṃtidevau
yayātimāṃdhātṛbhagīrathāśca
ete ṣoḍaśa saṃkhyākā mahārājāḥ prakīrtitāḥ
caturvarṇāśramācārān pālayaṃto yathākramam
sarve te kṣatradharmeṇa rakṣanti sma mahīmimām
kārttike śuklanavamī tṛtīyā mādhave'malā
māghe daśauṃ namasye tu kāmarātrī yugādayaḥ
tapo dharmaḥ kṛtayuge jñānaṃ tretāyuge tathā
dvāpare cādhvaro dharmaḥ tiṣye dānaṃ dayā damaḥ
tretāyāmābdiko dharmo dvāpare māsikassmṛtaḥ
yathāśakti caretprājñastadahnā prāpnuyātkalau
puṣkaraṃ tu kṛte sevyaṃ tretāyāṃ naimiśaṃ tathā
dvāpare tu kurukṣetraṃ kalau gaṃgāṃ samāśrayet
kṛte tu mānavā dharmā tretāyāṃ gautamāssmṛtāḥ
dvāpare śāṃkhalikhitāḥ kalau pārāśarāssmṛtāḥ
kṛte tvasthigatāḥ prāṇāḥ tretāyāṃ māṃsamāśritāḥ
dvāpare raktamāpannāḥ kalāvannaṃ samāśritāḥ
garbho bhavetkṛte smṛtvā tretāyāṃ dṛṣṭimātrataḥ
dvāpare sparśanādgarbhaḥkalau saṃsargamātrataḥ
abhigamya kṛte dānaṃ tretāsvāhūya dīyate
dvāpare yācamānāya sevayā dīyate kalau