Shivattvaratnakara 26.75

26.75

dhyāyan kṛte yajan yajñaistretāyāṃ dvāpare'rcayan
yadāpnoti tadāpnauti kalau saṃkīrtya śaṃkaram
kṛtatretādhipo viṣṇurdvāpare padmajo'dhipaḥ
kale rudro'dhipaḥ prokto yugānāmīśvarāḥ kramāt
catustridvyekapādāḍhyo dharmaḥ kṛtayugādiṣu
āyuṣyaṃ ca tathāpnoti prāṇināṃ niścitaṃ śatam
śatamāyurmanuṣyāṇāṃ dviśataṃ caiva rakṣasām
sahasraṃ kākaphaṇināṃ ṣaṭtriṃśanmṛgapakṣiṇām
vyāghrāṇāṃ ca catuṣṣaṣṭiśataṃ kesaridantinām
bhallūkānāṃ vānarāṇāṃ maṇḍūkānāṃ śatatrayam
dvātriṃśattu turaṃgāṇāṃ kharāṇāṃ paṃcaviṃśatiḥ
lulāyānāṃ tathoṣṭrāṇāṃ caturviṃśatisammitam
ṣoḍaśājāvikānāntu śunāṃ dvādaśa sammitam
haṃsānāṃ paṃcadaśakaṃ kukkuṭānāṃ samāṣṭakam
kapotānāṃ paṃcadaśa barhiṇāṃ viṃśatistathā
mārjāraśaśakādīnāmāyurdvādaśa vatsarāḥ
matsyakacchapanakrāṇāṃ jalūkānāṃ ca viṃśatiḥ
makṣikāmaśakādīnāṃ matkuṇānāṃ trimāsakam
svedajakrimidaṃśānāṃ ṣaṇmāsā āyurucyate
babhramūṣakapallīnāṃ saraṭānāṃ daśābdakam
jīvetpipīlikā varṣamityamāyurviniścayaḥ
etacca dvāparatretākṛtasaṃjñe yugatraye
uttarottarabhedaḥ syāduktādvitricaturguṇam