Shivattvaratnakara 30.96

30.96

sarvatraiva prayoktavyāḥ kṛcchrādivratakarmaṇi
kuśāgranyudakakṣīradadhigomūtraviḍghṛtam
prāśyāpare'hanyupavasan kṛcchraṃ sāntapanaṃ caret
gomūtraṃ tāmravarṇāyāḥ śvetāyāścaiva gomayam
payaḥ kāñcanavarṇāyā nīlāyāśca tathā dadhi
ghṛtaṃ ca kṛṣṇavarṇāyāssarvaṃ kāpilameva vā
alābhe sarvavarṇānāṃ pañcagavyeṣvayaṃ vidhiḥ
gomūtraṃ māṣakāstvaṣṭau gomayasyatu ṣoḍaśa
kṣīrasya dvādaśa proktā dadhnastu daśa kīrtitāḥ
gomūtravad ghṛtasya syāttadardhaṃ tu kuśodakam
anyena svalpaviddhaṃ vā pipeddravyaṃ payassakṛt
gavyasya payaso'lpatve gavyameva bhaveddadhi
dadhno'bhāve tu takraṃ syā ttakrābhāve tu yāvakam
etadeva samabhyastamiti sāntapanaṃ smṛtam
pṛthak sāntapana dravyaiṣṣaḍahaṃ copavāsataḥ
sāptāhnikastu kṛcchro'yaṃ mahāsāntapanassmṛtaḥ
tryahaṃ pibettu gomūtraṃ tryahaṃ vai gomayaṃ pibet
tryahaṃ dadhi tryahaṃ sarpistryahaṃ kṣīraṃ tataśśuciḥ
mahāsāntapanaṃ caitanmatāntarasamāśrayat
kramādekaikameteṣāṃ trirātramupayojayet
tryahaṃ copavasedante mahāsāntapanaṃ viduḥ
etānyeva tathā peyānyekaikasya tryahaṃ tryaham
mahāsāntapanaṃ nāma śvapākamapi śodhayet
parṇodumbararājīvabilvapatrakuśodakaiḥ
pratyekaṃ pratyahaṃ pītaiḥ pūrṇakṛcchra udāhṛtaḥ
taptakṣīraghṛtāmbūnāmekaikaṃ pratyahaṃ pibet
ekarātropavāsaśca taptakṛchra udāhṛtaḥ
ṣaṭpalaṃ ca pibedambhaḥ kṣīraṃ ca tripalaṃ pibet
palamekaṃ pibetsarpistaptacchraṃ vidhīyate
etaireva suśītaisyācchītakṛcchra udāhṛtaḥ