Shivattvaratnakara 31.15

31.15

rajāṃsīva sthūlarūpā romakūpeṣu me punaḥ
sūkṣmarūpāśca jaladhau budbudāvalayo yathā
anekaśo'vatiṣṭhante brahmāṇḍānāṃ samutkarāḥ
tasmādvoḍhuṃ kaḥ kṣameta māmityātmānamātmanā
dhārayāmīti saṃcintya vṛṣo bhūtvā ruroha tam
abhūttadādi vedāntavedyaḥ śrīvṛṣabheśvaraḥ
vāhanaṃ tasya devasya kimalpaṃ śaṃkaro'paraḥ
ayonissambhavo lokapāvano gokulādhipaḥ
dvitīyaśśambhurityurvyāṃ prasiddho dharmavigrahaḥ
vṛṣabheśasvarūpaṃ tu proktametanmayāsuta!
līlāntaraṃ ca tasyaiva nandikeśvaranāmakam
tatpravṛttimatho vakṣye laiṃge saṃvādarūpakam
gate vareṇye varade sahasrākṣe śilādanaḥ
ārāghayanmahādevaṃ tapasā'toṣayadbhavam
tadātasyaivamaniśaṃ tatparasya dvijasya tu
divyavarṣasahasraṃ tu gataṃ kṣaṇamivolbaṇam
valmīkenāvṛtāṃgaśca bhakṣitaśca khagairmuniḥ
bhakṣito'tha vṛkādyaiśca bhakṣito'hi mukhairmuniḥ
vakrasūcimukhaiśvānyai rākṣasībhiśca sarvataḥ
nirmāṃsarudhiratvagvai nirlepaḥ kuḍyavat sthitaḥ
asthiśiṣṭo'bhavatpaścāttatamanvata śaṃkaraḥ
yadā smṛto munissoyaṃ śaṃkareṇāsurāriṇā
tadaiva muniśārdūla uttasarja klamaṃ dvijaḥ
tapyatastasya tapasā pratutoṣa ca śaṃkaraḥ
tuṣṭassametya provāca sagaṇaścomayā saha
īśvara uvāca.
kiṃ kāryaṃ tapasā'nena tava tāta! mahāmate!
dadāmi putraṃ sarvajñaṃ sarvaśāstrārthapāragam
tataḥ praṇamya deveśaṃ stutvovāca śilādanaḥ