Shivattvaratnakara 31.29

31.29

harṣagadgadayā vācā somaṃ somavibhūṣaṇam
śilādanaḥ
bhagavan! devadeveśa! tripurārdana! śaṃkara
ayonijaṃ mṛtyuhīnaṃ putramicchāmi sattama!
īśvaraḥ
tava putro bhaviṣyāmi nandināmnā tvayonijaḥ
pitā bhaviṣyasi mama piturvai jagatāṃ mune!
evamuktvā tu sa muniṃ praṇipatya sthitaṃ ghṛṇī
somassomabhṛdīśānastatraivāntaradhīyata
nandīśvaraḥ
labdhaputraḥ pitā rudrātprīto mama pitā mune!
yajñāṃkaṇaṃ cakārātha yajñārthaṃ yajñavittamaḥ
tataḥ kṣaṇādahaṃ śambhostanujastasya tejasā
saṃjātaḥ pūrvamevāhaṃ yugāntāgni samaprabhaḥ
vavarṣustadā puṣkalāvartakādyā
jaguḥ kinnarāḥ khecarāścaiva siddhāḥ
śilādātmajatvaṃ gate mayyathendraḥ
sasarjāśu vṛṣṭiṃ supuṣpāmbumiśrām
taṃ dṛṣṭvā kālasūryābhaṃ jaṭāmukuṭadhāriṇam
tryakṣaṃ caturbhujaṃ śāntaṃ śūlakhaṭvāṃgadhāriṇam
vajriṇaṃ vajradaṃṣṭraṃ ca vajriṇā''rādhitaṃ śiśum
vajrakuṇḍalinaṃ ghoraṃ nīradopamanissvanam
brahmādyāstuṣṭuvussarve surāssendrāssureśvarāḥ
nedussamantatassarve nanṛtuścāpsarogaṇāḥ
munīndrā muniśārdūlā ṛgyajussāmasambhavaiḥ
stotrairmaheśvaraistutvā māṃ praṇemurmahātapāḥ!
brahmā hariśca rudraśca śakrassākṣācchivo'mbikā
jīvaścendurmahātejāḥ bhāskaraḥ pavano'nalaḥ
īśāno niṛtiryakṣo yamo varuṇa eva ca
viśve devāstathā rudrā vasavaśca mahābalāḥ
lakṣmīssākṣācchacī jyeṣṭhā devī caiva sarasvatī
aditiśca ditiścaiva śrutirlajjā dhṛtistathā