Shivattvaratnakara 31.74

31.74

śivaḥ
vatsa! nandin! mahābhāga! mṛtyorbhītiḥ kutastava
mayaiva preritau viprau matsamastvaṃ na saṃśayaḥ
vatsaitattava devasya laukikaṃ paramārthataḥ
nāstyeva vaidikaṃ dṛṣṭaṃ śilādena purā tava
devaiśca munibhi ssiddhairgandharvairdānavottamaiḥ
pūjitaṃ ca purā vatsa daivikaṃ nandikeśvara!
saṃsārasya svabhāvo'yaṃ sukhaduḥkhe punaḥ punaḥ
nṛṇāṃ yoge ratistyājyā sarvadaiva vivekinām
evamuktvā māṃ sākṣatsarvadeveśvareśvaraḥ
karābhyāṃ komalābhyāṃ cobhābhyāṃ māṃ parameśvaraḥ
pasparśa bhagavān rudraḥ praṇatārtiharo haraḥ
uvāca ca mahādevastuṣṭātmā vṛṣabhadhvajaḥ
nirīkṣya gaṇapān śreṣṭhān devīṃ himavatassutām
māmālokya ca tuṣṭātmā mahādevassureśvaraḥ
īśvaraḥ
amaro jarayā tyakto nityaṃ duḥkhavivarjitaḥ
akṣayaścāvyayaścaiva sapitā sasuhṛjjanaḥ
iṣṭo mama sadā caiva mama pārśvaṃ gatassurāḥ!
madvalaścaiva bhavitā mahāyogabalānvitaḥ
evamuktvā ca māṃ devo bhagavān sagaṇastathā
kuśeśayamayīṃ mālāṃ samunmucyātmanastathā
ābabandha mahātejā mahādevo vṛṣadhvajaḥ
tayā ca mālayā'tīva śubhayā kaṇṭhasaktayā
tryakṣo daśabhujaścaiva dvitīya iva śaṃkaraḥ
tata eva samādāya hastena parameśvaraḥ
uvāca brūhi kiṃ te'dya dadāmi varamuttamam
tato jaṭāsthitaṃ vāri gṛhītvā hāranirmalam
uktvā nandī bhavetyevaṃ sasarja vṛṣabhadhvajaḥ
tata ādityatoyā ca pūrṇā 1)śītajalā śubhā
padmotpalavanopetā prāvartata mahānadī
tāmuvāca mahādevo nadīṃ paramaśobhanām