Shivattvaratnakara 70.59

70.59

hakṣāṅgaṃ nirmalaṃ śyāmaṃ tāmrābhaṃ lavaṇopamam
ardhakhaṇḍaṃ ca vikṛtaṃ mauktikaṃ granthilaṃ tyajet
śaṃkhatimiveṇuvāraṇavarāhabhujagābhrajānyavedyāni
amitaguṇatvāccaiṣāmartho'yaṃ śāstranirdiṣṭaḥ
śaste'vanipradeśe rajatamaye bhājane sthite yasmin
varṣati divo'kasmāt tajjñeyaṃ nāgasambhūtam
etāni sarvāṇi mahāguṇāni sutārthasaubhāgyayaśaskarāṇi
saṃkīrtitānyeva tu pārthivānāṃ muktāphalānyarthitakāmamāni
siddhāvaraṇagaṅgāyāssiṃhale janma kīrtitam
kṣetrāṇi tasya catvāri māṇikyasya budhā jaguḥ
siṃhalaṃ prathamaṃ kṣetraṃ tataḥ kālapuraṃ param
āndhraṃ tṛtīyamādiṣṭaṃ caturthaṃ tumburaṃ smṛtam
siṃhale tadbhaveṃdraktaṃ padmarāgamamuttamam
pītaṃ kālapurodbhūtaṃ kuruvindamiti smṛtam
aśokapallavacchāyamāndhrasaugandhikaṃ viduḥ
tumbure chāyayā nīlaṃ nīlagranthi prakīrttitam
uttamaṃ siṃhalodbhūtaṃ nikṛṣṭaṃ tumburodbhavam
madhyayormadhyamaṃ jñeyaṃ māṇikyaṃ kṣetrayogataḥ
māṇikyasya samākhyātā aṣṭau doṣā munīśvaraiḥ
guṇāścatvāra ākhyātāśchāyāṣṣoḍaśa kīrttitāḥ
chāyādvitayasambandhi dvicchāyaṃ bandhunāśanam
dvirūpaṃ dvipadaṃ tena māṇikyena parābhavaḥ
sabhedaṃ bhinnamityuktaṃ śastraghātabhayāvaham
karkaraṃ śarkarāyuktaṃ paśubandhuvināśakam
dugdhamastusamākāraṃ laghunāpaṭamucyate
aśobhanaṃ taduddiṣṭaṃ māṇikyaṃ maṇikovidaiḥ
madhubindusamacchāyaṃ komalaṃ parikīrttitam
āyurlakṣmīṃ jayaṃ hanti sadoṣaṃ tanna dhārayet
rāgahīnaṃ jaḍaṃ proktaṃ dhanahānyāpavādakṛt
dhūmraṃ dhūmrasamākāraṃ dhruvaṃ tadbhayamāvahet
īdṛgdoṣayutā nindyā maṇayo mūlyavarjitāḥ
api prāptā na te dhāryā gṛhe śubhamabhīpsatā
māṇikyasya guṇāḥ proktāścatvāro munipuṅgavaiḥ
snigdhacchāyā gurutvaṃ ca nairmalyamatiraktatā
kuśeśayadalacchāyaṃ svacchaṃ snigdhaṃ gurusphuṭam
vṛttāyatapramāṇaṃ ca māṇikyaṃ śreṣṭhamucyate