Shivattvaratnakara 76.112

76.112

sadalaṃ pītavarṇaṃ ca bhaved gurvaramaṇḍale
arjunasya gireḥ pārśve jātaṃ podāraśṛṅgakam
gaurīpāṣāṇakaḥ pīta īṣadraktastu cūrṇakaḥ
rasavandhakaraḥ snigdho doṣaghno lohavedhakṛt
sauvīramañjanaṃ proktaṃ rasāñjanamataḥ param
sroto'ñjanaṃ tadanyacca puṣpāñjanamataḥ param
nīlāñjanamiti proktaṃ bhedapañcakasaṃyutam
iṣṭakācūrṇasaṃkāśaścandrikāyutirecanaḥ
saurāṣṭradeśakhanijo nāmatassihlako mataḥ
capalassphaṭikacchāyaṣṣaḍasrassnigdhako guruḥ
capalo bahubhedaśca sarvalohakaro mataḥ
hemastāro raviyamassīsātmānaṅgarūpadhṛt
tīkṣṇarūpaḥ kāṃsyarūpo rakto viṣamyastathā
tatra lohasadṛkṣo'sti viṣo haritavarṇabhāk
viṣākhyaṃ capalaṃ baddhvā nirjane sthāpayetkacit
taddhūmālokanācchīrṣapīḍā saṃjāyate nṛṇām
ajñānāttasya saṃsparśaṃ mriyate sadya evahi
sarveṣāṃ capalānāṃ vai svabhāvo'yamudāhṛtaḥ
nāgastambhe nāgarañje krameṇātīva śasyate
sarvalohāni kurvanti suvarṇaṃ tārameva hi
yuktāyāṃ sādhitassūto vinā bījāṃśakena ca
hiṃgulastrividho jñeyaścarmāraśśukatuṇḍakaḥ
haṃsapādāśca tatrādyaṃ hema kṛntase niyojayet
adhamaṃ taṃ vijānīyācchukatuṇḍaṃ tu madhyamam
uttamaṃ haṃsapādaṃ ca yojayeddhemaraupyayoḥ
carmārastīkṣṇarūpaḥ syāt kupitaśśukatuṇḍakaḥ
japākusumasaṃkāśo haṃsapādo mahottamaḥ
rasāyane sarvarogaharaṇe loharañjane
sūtasya rañjane śreṣṭhā varṇotkarṣaṇakarmaṇi
vaikrānta iva sarvatra darado jāyate guṇe
maladoṣādikaṃ nāsti sarvarogeṣu yujyate
sasyakastu samāyukto bhedaiḥ pañcabhirīritaiḥ