Shivattvaratnakara 85.65

85.65

vākye samāsabāhulyaṃ hyamojo nigadyate
kamanīyo'laukiko'pi yatrārthaḥ kāntirucyate
samādhiranyadharmāṇāmadhyāsārthagauravam
etaissamagrā vaidarbhī varṇyate daśabhirguṇaiḥ
asamastā dvitripadasamastā vā manoharā
alpaprāṇākṣaraprāyapadabandhasamanvitā
samastātyuddhaṭapadāmojaḥkāntisamanvitām
mahāprāṇākṣaravatīṃ gauḍīṃ prāhurvicakṣaṇāḥ
mādhuryasaukumāryaujaḥkāntibhissahatā guṇaiḥ
samastapañcaṣapadā pāñcālī parikīrttitā
samastarītisaṃmiśrā lāṭī mṛdusamāsinī
prayuktavarṇabhūyiṣṭhā svalpaghoṣārkṣairyutā
antarāle tu vaidarbhīpāñcālyoryā vatiṣṭhate
sāvantikā samastaissyād dvitritricaturaiḥ padaiḥ
lāṭīrīteḥ pratidvandvarīniyuktā tu māgadhī
śṛṅgārahāsyakaruṇaśāntamādhuryaśālinaḥ
vīraraudrādbhutabhayabībhatseṣvoja ucyate
raseṣveteṣu sarveṣu prasādaḥ parikīrttitaḥ
vikāsaṃ cātha saṃkṣepaṃ yā śabdānāṃ parasparam
cetaso vartayitrī ca sā vṛttiratha ṣaḍvidhā
kaiśikyārabhaṭī caiva sātvatī bhāratī tathā
madhyamārabhaṭī caiva tathā madhyamakeśikī
atyantasukumārārthasandarbhā kaiśikī matā
atiprauḍhārthasandarbhā vṛttirārabhaṭī matā
īṣatprauḍhārthasandarbhā sātvatī vṛttiriṣyate
īṣanmṛdvarthasandarbhā bhāratī vṛttiriṣyate
atyantasukumārau dvau śṛṅgārakaruṇau matau
atyuddhatarasau raudrabībhatsau parikīrttitau
īṣatprauḍhau samākhyātau rasau vīrabhayānakau
hāsyaśāntādbhutāḥ kiñcit sukumārāḥ prakīrttitāḥ
madhyamārabhaṭī tvanyāṃ tathā madhyamakeśikī
vṛttī ime ubhe 1) sarvarasasādhāraṇe mate
mṛdvarthe'pyanatiprauḍhabandhā madhyamakeśikī
madhyamārabhaṭī prauḍhe'pyarthenātimṛdukramā