Shivattvaratnakara 87.57

87.57

aṅgāvatārastvaṅkānto yato'ṅkasya vibhāgataḥ
ebhissūcyaṃ sūcayitvā dṛśyamaṅkaiḥ prayojayet
nāṭyadharmamavekṣyaiṣāṃ punarvastu tridheṣyate
sarveṣāṃ niyataśrāvyaṃ śrāvyamaśrāvya 1) bhedataḥ
sarvaśrāvyaṃ prakāśaṃ syādaśrāvyaṃ svagataṃ matam
dvidhānyannāṭyadharmākhyaṃ janāntamapavāritam
tripatākākareṇānyānapavāryāntarā kathām
rahasyaṃ kathyate'nyasya parāvṛtyāpavāritam
kiṃ bravīṣyevamityādi vinā pātraṃ bravīti yat
śrutvevānuktamapyekastat syādākāśabhāṣitam
pratyakṣanetṛcarito binduvyaktipuraskṛtaḥ
aṅko nānāprakārārthasaṃvidhānarasāśrayaḥ
sūtradhāro naṭīṃ brūte māriṣaṃ vā vidūṣakam
svakāryaprastutākṣepi citroktyā yattadāmukham
prastāvanā vā tatra syāt kathodghātaḥ pravartakam
prayogātiśayaśceti trīṇyaṅganyāmukhasya tu
svetivṛttasamaṃ vākyamarthaṃ vā yatna sūtriṇaḥ
gṛhītvā praviśet pātraṃ kathodghāto dvidhaiva saḥ
prastūyamānakālasya guṇavarṇanayānvitaḥ
praviśet sūcitaṃ pātraṃ yatra syāttatpravartakam
eṣo'yamityupakṣepāt sūtradhāraprayogataḥ
pātraprayogo yatrāyaṃ prayogātiśayo mataḥ
vīthyaṅgānyāmukhāṅgatvādyucyante'tra svabhāvataḥ
udghātyakāvalagite prapañcatrigate chalam
vākkelyadhivale gaṇḍamavasyanditanālike
asatpralāpavyāhāramṛdavāni trayodaśa
granthārthapadaparyāyamūlaḥ praśnottarasya ca
yatrānyonyaṃ samālāpo dvayorudghātyakaṃ matam
yatraikatra samāveśāt kāryamanyat prakāśyate
prastute'nyatra cānyat syāttaccāvalagitaṃ dvidhā
asadbhūtaṃ mithasstotraprapañco hāsyakṛnmataḥ
śrutisāmyādanekārthayojanaṃ trigataṃ matam
priyābhairapriyairvākyairvilobhācchalanaṃ chalam
vinivṛttasya vākkelirdvistriḥ pratyuktito'pi vā