Shivattvaratnakara 89.98

89.98

ṣaṣṭhādisthānage vāpi vidyāhīno bhaved dhruvam
bhāgyavāhanadeveśāḥ karmasthāstatpatistanau
lagnaṃ paśyanti ca yadā siṃhāsanapatirbhavet
candravāheeśadehānāṃ sambandhe tvaśvavāhanam
śukreṇāndolikāsiddhirguruṇā hemavāhanam
bhāgyapo vāhaneśaśca lābhasthāne yadi sthitau
paśyantau vāhanasthānaṃ nasya bhāgyaṃ bhaved dhruvam
bhāgyapo vāhanasthaśced dṛṣṭo vāpi śubhairyutaḥ
śubhadṛṣṭiyuto vāpi gurubhārgavasaṃyutaḥ
hemavāhanamāpnoti candravān candrayogataḥ
saptameśabalācchatraṃ cāmaraṃ śukrayogataḥ
vāhanādhipatirbhāgye tadīśaḥ kendrago yadi
śubhakṣetre śubhayute lagneśe cāpi kendrage
āndolikā bhavettasya lagnape vāhane sthite
bhāgyapo vāhaneśaśca śubhaśceddevavāhanam
dhaneśe vāhaneśe ca kendrasthe śubhasaṃyute
candrayoge yadi bhavedaśvaprāptirna saṃśayaḥ
lābheśe vāhanaṃ yāte lagne vāheśvare śubhe
dṛṣṭe vā vāhanasthāne nidhilābho bhavennṛṇām
yaduktaṃ tu phalaṃ pūrvaṃ tattat strīpuṃsayossamam
etāvān vartate tatra viśeṣassa tu kathyate
vaidhavyaṃ nidhanagṛhe patissaubhāgyaṃ sukhaṃ ca jāmitre
saundaryaṃ lagnagṛhe vicintayet putrasaṃpadaṃ navame
eṣu sthāneṣu yutāssaumyāśśubhadā balānvitā jñeyāḥ
krūrāstvaniṣṭaphaladā bhavaneśavivakṣitāssadā cintyāḥ
aṣṭame śubhasaṃyukte dhane pāpagrahānvite
kanyā sumaṅgalī jñeyā made pāpavivarjite
saptame navame saumye lābhe bhūsūnusaṃyute
bahukṣetradhanairyuktā putrapautrādisampadā
caturthe daśame saumye cāṣṭame pāpavarjite
kanyā sumaṅgalī jñeyā vyatyaye vidhavā bhavet
jāmitre gurusaṃyukte pūrṇe śītakare tanau
madeśe balasaṃyukte dīrghāyuśśrīsutairyutā
dhane śubhagrahairyukte cāṣṭame pāpavarjite
madeśe śubhasaṃdṛṣṭe saumaṅgalyādikaṃ bhavet